ޣައްޒާގެ މަސްރަހުން: ގައުމީ ލޯތްބާއި ދަރުމައަށް މަސައްކަތްކުރުމުގެ ހިތްގައިމު މަންޒަރުތަކެއް
25 އޮކްޓޯބަރު 2023 | ބުދަ 10:40މި ވަގުތަކީ ކާބޯތަކެއްޗާއި، ބޯފެނާއި، ބޭހުގެ އިތުރުން ތެލުގެ ސަޕްލައިވެސް ޣައްޒާއިން ހުސްވަމުންދާ ވަގުތު
އިޒްރޭލުން ދިން އިންޒާރާއެކު، މިލިއަނަކަށްވުރެ ގިނަ މީހުން ވަނީ ޣައްޒާގެ އުތުރުގެ ސަރަހައްދުތައް ދޫކޮށް، ދެކުނުގެ ވަގުތީ ހިޔާތަކަށް ބަދަލުވެފައި
އިޒްރޭލުގެ ޔަހޫދީން ދެމުންދާ އުދުވާނީ ހަމަލާތަކުގައި މުޅި ޣައްޒާ ސުންނާފަތި ކުރަމުންދާތާ 2 ހަފުތާއަށްވުރެ ގިނަ ދުވަސް ފާއިތުވެ ގޮސްފައިވާއިރު، ޣައްޒާގެ މަސްރަހުން ފެނިގެންދާ އިންސާނިއްޔަތުކަމާއި ދަރުމަވެރިކަމުގެ ލާމަސީލު ނަމޫނާއަށް މުޅި ދުނިޔޭގެ ތަރުހީބު ހައްގު ނުވާނެ އެއްގޮތެއްވެސް ނެތެވެ. އިންސާނީ ކަރާމާތާއި އިންސާނިއްޔަތުކަމަކީ ކޮބައިކަން ދެނެގަންނަން ބޭނުންނުވާ ޔަހޫދީން ދެމުންދާ އުދުވާނީ ހަމަލާތަކާއެކު، 2.3 މިލިއަން މީހުންގެ އާބާދީ އޮތް ޣައްޒާގައި ހަމަޖެހިލައިގެން ދިރިއުޅޭ ހަމަ އެކަކުވެސް ނެތެވެ.
ބިރުވެރިކަމާއި ނަމާންކަމުގެ ޖަލެއްގައި ގައިދުވެފައިވާ ހާލުގައިވެސް، ޣައްޒާގެ ރަށްވެހިން ދަނީ، އެކަކު އަނެކަކަށް އެހީތެރިވުމުގައި މުޅި ދުނިޔެއަށް މިސާލު ދައްކައިދެމުންނެވެ. މި ވަގުތަށް އޮތް އެންމެ ރައްކާތެރި މަންޒިލް ކަމަށް ދެކިގެން، އެތައް ބަޔަކު ވަނީ އދ.ން ހިންގާ ސްކޫލު އިމާރާތްތަކަށް އެމީހުންގެ ދިރިއުޅުން ބަދަލު ކޮށްފައެވެ. ލައިގެންހުރި އަންނައުނު ފިޔަވާ އިތުރު އެއްވެސް އެއްޗެއް އެމީހުންގެ އަތުގައި ނެތް ހާލުގައި ދިރިއުޅެމުންދާ އެތައް ލައްކަ ބަޔަކަށް ކާބޯތަކެތީގެ އެހީތެރިކަން ފޯރުކޮށްދިނުމުގެ އެންމެ ކުރީ ސަފުގައިވެސް ހަރަކާތްތެރިވަނީ ހަމަ އެފަދަ ގޮތަކަށް ހާލުގައި ޖެހިފައި ތިބި މީހުންނެވެ.
މި މިވަގުތަކީ ކާބޯތަކެއްޗާއި، ބޯފެނާއި، ބޭހުގެ އިތުރުން ތެލުގެ ސަޕްލައިވެސް ޣައްޒާއިން ހުސްވަމުންދާ ވަގުތެކެވެ. ނަމަވެސް، ދަރުމަވެރިންގެ ދީލަތި ލޯގަނޑުތަކުން އެ މަންޒަރެއް ނުފެނެއެވެ. ލިބުނު އެއްޗަކުން ފުއްދާލައިގެން، ހިލޭ ސާބަހަށް ޚިދުމަތް ކުރަމުން އެދަނީ ހަމަ ތިބާފަދަ އަޚުންނާއި އުޚުތުންނަށްޓަކައެވެ.
އިޒްރޭލުން ދިން އިންޒާރާއެކު، މިލިއަނަކަށްވުރެ ގިނަ މީހުން ވަނީ ޣައްޒާގެ އުތުރުގެ ސަރަހައްދުތައް ދޫކޮށް، ދެކުނުގެ ވަގުތީ ހިޔާތަކަށް ބަދަލުވެފައެވެ. އެއީ ސަލާމަތާއި ރައްކާތެރިކަމަށް އެދިގެން އެމީހުން ކުރި ކަމަކަށް ވީނަމަވެސް، ދެކުނަށް އަމާޒުކޮށްގެން އިޒްރޭލުން ދޭ ހަމަލާތައް ވަކި މަދެއްނުވެއެވެ.
އޮކްޓޯބަރު 7 ވަނަ ދުވަހުން ފަށައިގެން އިޒްރޭލުން ދެމުންދާ ލާއިންސާނީ ހަމަލާތަކުގައި ފަލަސްތީނުން މަރުވި މީހުންގެ އަދަދު، އޮކްޓޯބަރު 24 ވަނަ ދުވަހަށް އަލިވިލުނުއިރު 5000ން މައްޗަށް ވަނީ އަރާފައެވެ. އެތައް ހާސް ބަޔަކު ވަނީ ޒަޚަމްވެފައެވެ. މަރުވި މީހުންނާއި ޒަޚަމްވި މީހުންގެ ތެރޭގައި ގިނަ އަދަދަކަށް ކުޑަކުދިން ހިމެނެއެވެ. މިލިއަނަކަށްވުރެ ގިނަ މީހުންގެ ގެދޮރު ގެއްލި، ވަގުތީ ހިޔާތަކުގައި ހިތްދަތިކަމާއި ނާމާންކަމުގެ ތެރޭގައި ދުވަސްތައް ގުނަން ޖެހިފައިވާއިރު، އޭގެ ތެރޭގައިވެސް ގިނައީ ކުށެއް ނެތް، މައުސޫމު ކުޑަކުދިންނެވެ.
