ފަލަސްތީނަށް 2 މިލިއަން މަސްދަޅު ހަދިޔާ ކުރަން ރައީސް ނިންމަވައިފި
24 އޮކްޓޯބަރު 2023 | އަންގާރަ 18:27މިއީ ފަލަސްތީނުގައި ހާލުގައި ޖެހިފައިވާ ފަރާތްތަކަށް އިންސާނިއްޔަތަށްޓަކައި އެހީ ފޯރުކޮށްދިނުމަށް ކުރަމުންދާ މަސައްކަތްތަކަށް އެއްބާރުލުން ދިނުމަށް ދޭ އެހީއެއް
ވަޒީރުންގެ މަޖިލީހުގެ ޖަލްސާއެއް ކުރިއަށްދަނީ
ފަލަސްތީނުގެ ރައްޔިތުންނަށް ދިވެހިސަރުކާރުން ދެ މިލިއަން ކަނޑު މަސްދަޅު ހަދިޔާކުރުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ނިންމަވައިފިއެވެ.
އެމަނިކުފާނު މިގޮތަށް ނިންމެވީ އަންގާރަ ދުވަހުއެވެ. މި މަސްދަޅުތައް ހަދިޔާކުރައްވަން އެމަނިކުފާނު ނިންމެވީ ފަލަސްތީނާއި އިސްރާއީލާ ދެމެދު ހިނގަމުންދާ ހަމަނުޖެހުންތަކުގައި އެ ޤައުމުގައި ހާލުގައި ޖެހިފައިވާ ފަރާތްތަކަށް އިންސާނިއްޔަތަށްޓަކައި އެހީ ފޯރުކޮށްދިނުމަށް ކުރަމުންދާ މަސައްކަތްތަކަށް އެއްބާރުލުން ދިނުމުގެ ގޮތުންނެވެ.
މި އެހީއާ ގުޅޭގޮތުން ފޮރިން މިނިސްޓަރު އަބްދުﷲ ޝާހީދު ވިދާޅުވީ ފަލަސްތީނުގެ ރައްޔިތުން، ވަކި ދައުލަތެއް އުފެއްދުމަަށާއި އަމިއްލަ ޙައްގުތައް ކަށަވަރުކުރުމަށްޓަކައި ކުރަމުންދާ މަސައްކަތަކުގައި އެއްވެސް ޝަރުތަކާނުލައި ތާއިދު ކުރުންމަތީ ދިވެހި ސަރުކާރާއި ރައްޔިތުން ތިބޭނެ ކަމަށެވެ.
މި މަހުގެ ހަތް ވަނަ ދުވަހުން ފެށިގެން ފަލަސްތީނަށް އިސްރާއީލުން ދެމުން އަންނަ ހަމަލާތަކުގައި މިހާތަނަށް 5000 އަށްވުރެ ގިނަ މީހުންގެ ފުރާނަ ވަނީ ގެއްލިފައެވެ. މީގެ ތެރޭގައި 2000 އަށްވުރެ ގިނަ ކުޑަކުދިންނާއި 1500 އެއްހާ އަންހެނުން ހިމެނެއެވެ.
މީގެ އިތުރުން ޢައްޒާއަށް ދެމުން އަންނަ ހަމަލާތަކުގައި ގިނަބައެއްގެ ގެދޮރު ގެއްލި ވަނީ ހާލުގައި ޖެހިފައެވެ.
ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދިނުމަށް ފައިސާ ހޯދުމަށް ރާއްޖޭގެ އެކި ރަށްރަށުން އަންނަނީ ރަށު ފެންވަރުގައި ވެސް ހަރަކާތްތައް ހިންގަމުންނެވެ.
