ޓޮޓެންހަމް ލީގު ތާވަލްގެ އެއްވަނަ އަށް!

2-0 ން ފުލަމް ބަލިކޮށް, އިނގިރޭސި ޕްރިމިއަރ ލީގު ތާވަލްގެ އެއްވަނާގައި ޓޮޓެންހަމް އިން ދެ ޕޮއިންޓްގެ ލީޑެއް ނަގައިފިއެވެ.

މެޗަށް ނުކުތްއިރު 20 ޕޮއިންޓާއެކު ތިންވަނާގައި އޮތް ޓޮޓެންހަމް އިން އެއްވަނަ އަށް ޖެހިލީ އަމިއްލަ ދަނޑުގައި ފުލަމް ބަލިކޮށްގެންނެވެ. މެޗުގައި ޓޮޓެންހަމްގެ ދެ ލަނޑު ޖެހީ ސޮން އާއި މަޑިސަންއެވެ. ފުރަތަމަ ހާފް ނިމެން ނުވަ މިނެޓަށް ވެފައިވަނިކޮށް ލީޑް ނަގައިދިނީ ކެޕްޓަން ސޮން އެވެ. ދެވަނަ ހާފްގެ ކުރީކޮޅު ލީޑް ފުޅާކޮށްދިނީ މަޑިސަންއެވެ. މަޑިސަން ލަނޑު ޖަހަން ފުރުޞަތު ތަނަވަސްކޮށްދިނީވެސް ފުރަތަމަ ލަނޑު ޖެހި ސޮން އެވެ.

ފޯވާޑް އަދި ކެޕްޓަން ހެރީ ކޭން ދޫކޮށްލުމަށްފަހުވެސް, މިސީޒަންގައި ކޯޗު ޕޮސްޓެކޮގްލޫގެ އިރުޝާދުގެ ދަށުން ޓޮޓެންހަމްއިން އަންނަނީ ރަނގަޅަށް ކުޅެ ނަތީޖާ ނެރެމުންނެވެ. ކޭން ނެތުމުގެ އުނިކަން ފޫބެއްދުމުގައި އައު ކެޕްޓަން ސޮން އަންނަނީ ތަފާތު ދައްކަމުންނެވެ. މެޗުގައި އޭނާ ޖެހީ ސީޒަންގެ ހަތްވަނަ ލަނޑެވެ. މޮޅާއެކު ޓޮޓެންހަމް އެއްވަނާގައި އޮތީ ނުވަ މެޗުން 23 ޕޮއިންޓް ހޯދައިގެންނެވެ. ދެވަނާގައިވާ ޗެމްޕިއަން ސިޓީއާއި ތިންވަނާގައިވާ އާސެނަލް އަށް ލިބިފައިވަނީ 21 ޕޮއިންޓެވެ. ހަތަރު ވަނާގައި އޮތީ 20 ޕޮއިންޓާއެކު ލިވަޕޫލެވެ.