އިމާރާތުގެ ދަތިކަމުގެ ސަބަބުން ތާވަލު ކުރާ އަޑުއެހުންތައް 50 އިންސައްތައަށްވުރެ ބޮޑަށް ވަނީ ދަށްވެފައި: ކްރިމިނަލް ކޯޓު
ކްރިިމިނަލް ކޯޓުގައި މިހާރު ބޭނުން ކުރަމުން އަންނަނީ ޝަރީއަތް ކުރާ ފަސް މާލަން
ކްރިމިނަލް ކޯޓް
އިމާރާތުގެ ދަތިކަމުގެ ސަބަބުން ތާވަލު ކުރާ އަޑުއެހުންތަކުގެ އަދަދު 50 އިންސައްތައަށްވުރެ ބޮޑަށް ދަށްވެފައިވާ ކަމަށް ކްރިމިނަލް ކޯޓުން ބުނެފިއެވެ.
ހޯމަ ދުވަހު ކްރިމިނަލް ކޯޓުން ބުނީ އެ ކޯޓަކީ ރާއްޖޭގެ ޖިނާއީ އަދުލުގެ ނިޒާމުގެ 70 އިންސައްތައަށް ވުރެ ގިނަ މައްސަލަ ހުށަހަޅާ ކޯޓު ކަމަށެވެ. އަދި އެ ކޯޓުގައި މިވަގުތު 11 ގާޒީން ތިއްބެވިއިރު ކޯޓުގެ އިމާރާތުގެ އެއްބައި ބޭނުން ކުރުން ހުއްޓާލުމަށް ޖޭއެސްސީން އެންގުމާ ގުޅިގެން ޖާގައިގެ ދަތިކަން ދިމާވެފައިވާ ކަމަށް ވެސް އެ ކޯޓުން ބުންޏެވެ.
ކްރިިނަލް ކޯޓުގައި މިހާރު ބޭނުން ކުރަމުން އަންނަނީ ޝަރީއަތް ކުރާ ފަސް މާލަމެވެ. މި ފަސް މާލަމުގެ ތެރެއިން އެއް މާލަން ކޮންމެ ދުވަހަކުވެސް ބަންދާމެދު ގޮތެއް ނިންމުމުގެ މަޖިލިސްތަކަށް ހާއްސަ ކުރެވޭ ކަމަށާއި ބާކީ ހުރި ހަތަރު މާލަން، ގާޒީންގެ މެދުގައި ހަމަހަމަކޮށް ބަހާލައިގެން އަޑުއެހުންތައް ޝެޑިއުލް ކުރާ ކަަމަށް ވެސް އެ ކޯޓުން ބުންޏެވެ.
އިމާރާތުގެ ދަތިކަމުގެ ސަބަބުން އަޑުއެހުންތަކުގެ އަދަދު 50 އިންސައްތައަށްވުރެ ބޮޑަށް ދަށްވެފައިވާކަން ފާހަގަކޮށް ކްރިމިނަލް ކޯޓުން ބުނީ މުވައްޒަފުންނާއި ގާޒީން މަސައްކަތް ކުރުމަށް ރައްކާތެރި މާހައުލެއް ނެތް ކަމަށެވެ. މި ކަމުގެ ސަބަބުން ޝަރީއަތްތަކަށް ބުރޫއެރިނަމަވެސް ބަންދާމެދު ގޮތެއް ނިންމުމާއި އެހެން ކޯޓު އަމުރުތައް ނެރުމުގެ މަސައްކަތްތައް މެދުނުކެނޑި ކުރިއަށްގެންދާކަން ވެސް ކޯޓުން ފާހަގަކުރިއެވެ.
މީގެ އިތުރުން ކްރިމިނަލް ކޯޓުގެ އައު އިމާރާތުގެ ކަންކަން ޑީޖޭއޭގެ ބެލުމުގެ ދަށުން ކުރިއަށްގެންދާއިރު އެތަނަށް ބަދަލުވެވޭނެ ތާރީހެއް އަދިވެސް ނޭނގޭ ކަމަށް އެ ކޯޓުން ބުންޏެވެ.
ކްރިމިނަލް ކޯޓް ހިންގަމުންދާ އިމާރާތަކީ ބޭނުންކުރުމަށް އެއްވެސް މިންވަރަކަށް ރައްކާތެރި ތަނެއް ނޫންކަމަށް ކަމާބެހޭ ފަންނީ މާހިރުން އިރުޝާދު ދީފައިވާތީ ކްރިމިނިލް ކޯޓު ވަގުތީ ގޮތުން އެހެން އިމާރާތަކަށް ބަދަލުކުރުމަށް ޖޭއެސްސީން ވަނީ ނިންމާފައެވެ.
