އެޓޯލްސް އެފްސީ އަށް ބްރެޒިލްގެ ފޯވާޑެއް
އެ ކުލަބުން ސޮއި ހޯދީ ބްރެޒިލްގެ އުމުރުން 34 އަހަރުގެ ޓިޓޯގެ
އެޓޯލްސް އެފްސީ އަށް ސޮއި ކުރި ބްރެޒިލްގެ ޓޮޓީ
އަލަށް ފުޓުބޯޅަ އަށް ނިކުންނަން މަސައްްކަތް ކުރަމުން އަންނަ އެޓޯލްސް ފުޓުބޯޅަ ކުލަބު (އެޓޯލްސް އެފްސީ) އަށް ބްރެޒިލްގެ ފޯވާޑެއް ސޮއި ކޮށްފި އެވެ.
މިއީ އެޓޯލްސް އެފްސީން އެ ޓީމަށް ހޯދި ބިދޭސީ ފުރަތަމަ ކުޅުންތެރިޔާ އެވެ. އެ ކުލަބުން ސޮއި ހޯދީ ބްރެޒިލްގެ އުމުރުން 34 އަހަރުގެ ޓިޓޯގެ އެވެ. އޭނާ އަކީ ބްރެޒިލްގެ ގިނަ ކުލަަބުތަކަށް ކުޅެފައިވާ ކުޅުންތެރިޔެކެވެ. އެޓޯލްސް އެފްސީން ހާމަކޮށްފައިވާ ގޮތުގައި އެ ކުލަބުން މިހާރު ވަނީ ޓިޓޯ އާއެކު އެއްބަސްވުމުގައި ސޮއި ކޮށްފަ އެވެ. މީގެ އިތުރުން ކުރިއަށް އޮތް މުއްދަތުގައި އިތުރު ކުޅުންތެރިން ހޯދުމުގެ މަސައްކަތް ކުރަމުން އަންނަ ކަމަށާއި، އެކަން ހާމަކުރާނެ ކަމަށް ވެސް އެ ކުލަބުން ވަނީ ބުނެފަ އެވެ.
އެޓޯލްސް އެފްސީގެ ކޯޗަކަށް ހަމަޖައްސާފައި ވަނީ އަލީ ވަޙީދު އެވެ. އޭނާގެ އެސިސްޓެންޓެއްގެ ގޮތުގައި މަސައްކަތް ކުރާނީ ކުރިން ނިއު ރޭޑިއަންޓް ސްޕޯޓްސް ކުލަބަށް ކުޅުނު އަޙުމަދު ނިޔާޒް (ނިޔައްޓޭ) އެވެ.
