ފާއިތުވެދިޔަ އިންތިޚާބުގައި އޮތް އެންމެ ބޮޑު ނުފޫޒަކީ ދޮގާއި ވަހުމް: މެންބަރު އަސްލަމް
ސަރުކާރު ކުންފުނިތައް ހަރުދަނާ ކުރަން ޖެހޭ
ހިތަދޫ އުތުރު ދާއިރާގެ އެމްޑީޕީ މެންބަރު އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް
ފާއިތުވެދިޔަ އިންތިޚާބުގައި އޮތް އެންމެ ބޮޑު ނުފޫޒަކީ ދޮގާއި ވަހުމް ކަމަށް ހިތަދޫ އުތުރު ދާއިރާގެ އެމްޑީޕީ މެންބަރު އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް ވިދާޅުވެއްޖެއެވެ.
ހޯމަ ދުވަހުގެ ރައްޔިތުން މަޖިލީހުގެ ޖަލްސާގައި، މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ ހުށަހަޅުއްވާފައިވާ، އިންތިޚާބުތަކަށް ސަރުކާރުން ނާޖާއިޒު ނުފޫޒާއި ބާރުފޯރުވަމުންދާތީ، އިންތިޚާބުތައް އިންސާފުވެރިކުރުމަށާއި މިނިވަންކުރުމަށް ވެފައިވާ ވައުދާ އެއްގޮތަށް ސަރުކާރުން ކަންކަން ތަންފީޒުކޮށް މަގުފަހިކުރުމަށް ގޮވާލާފައިވާ ގަރާރުގެ ބަހުސްގައި ވާހަކަފުޅު ދައްކަވަމުން މެންބަރު އަސްލަމް ވިދާޅުވީ އިންތިޚާބުތަކަށް އޮތް އެންމެ ބޮޑު ނުފޫޒަކީ ހަގީގަތާއި ހިލާފަށް ފަތުރަމުންދާ ދޮގުވާހަކަތައް ކަމަށެވެ. އެއީ އިންތިޚާބެއްގައި ތެރޭގައި ފެތުރޭނެ އެންމެ ގޯސް އެންމެ ބޮޑު ނުފޫޒު ކަމަށް މެންބަރު އަސްލަމް ވިދާޅުވިއެވެ.
ފެނަކަ ކޯޕްރޭޝަނަށް ކުރެވޭ ތުހުމަތުތަކަށް ރައްދު ދެއްވައި މެންބަރު އަސްލަމް ވިދާޅުވީ ސަރުކާރު ކުންފުނިތައް ހަރުދަނާ ކުރަން ޖެހޭ ކަމަށެވެ.
ސަރުކާރު ބަދަލުވެގެން ދިޔަ ނަމަވެސް ސަރުކާރުގައި މަސައްކަތް ކުރާ މުވައްޒަފުން ނުވަތަ ބޭފުޅުން ބަދަލުވާން ނުޖެހޭ ކަމަށާއި، ސަރުކާރުގެ ކުންފުނިތައް ހިންގަންޖެހޭނީ އެ އުސޫލުން ނޫން ކަމަށް އަސްލަމް ވިދާޅުވިއެވެ. ސަރުކާރުގެ ކުންފުނިތައް ހިންގަންޖެހޭނީ ގާބިލް ބޭފުޅުންކަން ފާހަގަކުރައްވައި މެންބަރު އަސްލަމް ވިދާޅުވީ ކޮންމެ ފަސްއަހަރަކުން ބޭފުޅުންތައް ބަދަލުވާކަމަށްވާނަމަ ހަރަދުނާ ގޮތެއްގައި ސަރުކާރު ހިންގާނެ ގޮތަކާމެދު ސުވާލު އުފެދޭ ކަމަށެވެ.
މެންބަރު އަސްލަމް ވިދާޅުވީ ސަރުކާރުގެ ކުންފުނިތަކުގެ ބޭފުޅުން ބަދަލުވާއިރު، މިނިވަން މުވައްސަސާތަކަށް ވެސް ބަދަލު އަންނަ ކަމަށެވެ. ގައުމު ހަރުދަނާ ގޮތުގައި ހިންގުމަށް މި ކަމަށް ހައްލުތަކެއް ހޯދަންޖެހޭ ކަމަށް މެންބަރު އަސްލަމް ވިދާޅުވިއެވެ.
