ޝާހީން އަފްރީދީ ރެކޯޑަކަށް އަމާޒު ހިފައިފި

ޕާކިސްތާނުގެ ބާރު އުކުންތެރިޔާ ޝާހީން ޝާހު އަފްރީދީ އައު ރެކޯޑަކަށް އަމާޒު ހިފައިފި އެވެ.

އޭނާ މިހާތަނަށް ވަނީ އެއް ދުވަހުގެ މެޗުތަކުގައި 48 މެޗުން 95 ވިކެޓް ނަގައިފަ އެވެ. ވާތުން އުކާ ކުޅުންތެރިޔާ މިހާރު އަމާޒު ހިފާފައިވަނީ އެއް ދުވަހުގެ މެޗުތަކުގައި އެންމެ އަވަހަށް 100 ވިކެޓް ނަގާ ކުޅުންތެރިޔާ އަށް ވުމަށެވެ. މި ރެކޯޑް މިހާރު އޮތީ ޕާކިސްތާނުގެ ކުރީގެ ކުޅުންތެރިޔާ ސަގްލައިން މުސްތާގްގެ އަތުގަ އެވެ.

އިންޑިޔާގައި މިހާރު ކުރިއަށްދާ ކްރިކެޓް ވޯލްޑްކަޕުގައި ހުކުރު ދުވަހު ޝާހީން ވަނީ އޮސްޓްރޭލިޔާއާ ދެކޮޅަށް ފަސް ވިކެޓް ނަގައިފަ އެވެ. މި އާއެކު އޭނާ ވެފައިވަނީ ވާތުން އުކާ ކުޅުންތެރިންގެ ތެރެއިން ޕާކިސްތާނުން އެންމެ ގިނަ ވިކެޓް ނެގި ކުޅުންތެރިޔާ އަށެވެ. ކުރިން މި ރެކޯޑް އޮންނަނީ މުހައްމަދު އާމރުގެ އަތުގަ އެވެ.

ޝާހީންގެ ކުޅުމަށް ޕާކިސްތާނުގެ ކުރީގެ ކުޅުންތެރިން ދަނީ އޭނާ އަށް ތައުރީފް ކުރަމުންނެވެ. މި ގޮތުން ކުރީގެ އުކުންތެރިޔާ އަދި ބެޓްސްމަން ޝާހިދު އަފްރީދީ އޭނާގެ ޅީދަރިފުޅާމެދު ބުނީ އެއި ދުނިޔޭގެ ފެންވަރުގެ ކުޅުންތެރިއެއް ކަމަށެވެ.