އިއްބެ ދެވަނަ ޑިވިޝަން ކުޅެން މަސްއޮޑިއަށް!

މިސީޒަންގައި ކްލަބް ވެލެންސިޔާއަށް ކުޅެން ސޮއިކުރި ނަމަވެސް, ކްލަބް އޮތް ހާލަތުން ކުޅުމުގެ ފުރުޞަތު ގެއްލުނު މިޑްފީލްޑަރ އިބްރާހީމް ވަހީދު (އިއްބެ) ދެވަނަ ޑިވިޝަންގައި މަސްއޮޑި ސްޕޯރޓްސް ކްލަބަށް ކުޅެން ސޮއިކޮށްފިއެވެ.

ޤައުމީ ޓީމްގެވެސް މިޑްފީލްޑަރަށް މިސީޒަންގައި ފުރަތަމަ ޑިވިޝަންގައި ކުޅުމުގެ ފުރުޞަތެއް ނުލިބުނެވެ. އެއީ ވެލެންސިޔާއަށް ސޮއިކުރި ނަމަވެސް ކުޅުންތެރިން ރަޖިސްޓްރީ ނުކުރެވޭ ގޮތަށް އެކްލަބަށް ފީފާއިން ދީފައިވާ އަދަބުން ސަލާމަތްނުވެވުމުންނެވެ. ކުޅުންތެރިންނަށް މުސާރަ ނުދޭ މައްސަލަތަކެއް ފީފާއަށް ހުށަހަޅާފައިވާތީ އެކަން ހައްލުކުރަން ދިން މުއްދަތުގައި ވެލެންސިޔާއަށް އެކަން ހައްލެއް ނުކުރެވުނެވެ. ޓީމަށް ކުޅެން ފުރުޞަތު ނުލިބުނަސް މިއަހަރުވެސް އިއްބެއަށް ގައުމީ ޓީމުން ފުރުޞަތު ދިނެވެ.

އިއްބެ ވެލެންސިޔާއަށް ބަދަލުވީ މާޒިޔާގައި ކާމިޔާބީތަކެއް ހޯދުމަށްފަހުއެވެ. އޭގެކުރިން އޭނާ ފާހަގަވީ ޓީސީ ސްޕޯރޓްސް ކްލަބުންނެވެ. އެކްލަބާއެކު ލީގު ހޯދިއެވެ. އެކަމަކު އެންމެ ފުރަތަމަ 2013 ވަނަ އަހަރު އޭނާ ކުޅެން އައީ ނިއުރޭޑިއަންޓަށެވެ. އިއްބެ އަކީ 2018 ވަނަ އަހަރު ސާފް ޗެމްޕިއަންޝިޕް ހޯދި ޓީމްގެ މުހިއްމު ކުޅުންތެރިއެކެވެ. 2016 ވަނަ އަހަރުން ފެށިގެން އޭނާ އަންނަނީ ގައުމީ ޓީމަށް ކުޅެމުންނެވެ. އެކަމަކު ވަރލްޑް ކަޕް ކޮލިފައިންގައި އެންމެ ފަހުން ބަނގްލަދޭޝްއާ ދެކޮޅަށް ކުޅެން ނެގި ޓީމްގެ ސްކޮޑްގައި ނުހިމެނެއެވެ.

ދެވަނަ ޑިވިޝަނަށް ހަތަރު ޓީމަކުން އަންނަނީ ރަނގަޅަށް ތައްޔާރުވަމުންނެވެ. އެއީ ރައްޖޭގެ އެންމެ ކާމިޔާބު ދެކްލަބް ނިއުރޭޑިއަންޓާއި, ވިކްޓްރީގެ އިތުރުން ލެގޫންސް ސްޕޯރޓްސް ކްލަބާއި މަސްއޮޑި ސްޕޯރޓްސް ކްލަބެވެ. މަސްއޮޑި ސްޕޯރޓްސް ކްލަބްގެ ކޯޗަކީ މުޙައްމަދު އާތިފް އެވެ.