މަކުނުދޫގައި ގޭސް ސިލިންޑަރު ގޮވުމުގެ ހާދިސާ ތަހުގީގުކުރުމަށް ފޮރެންސިކް ޓީމެއް އެރަށަށް ހިނގައްޖެ
21 އޮކްޓޯބަރު 2023 | ހޮނިހިރު 16:43މިކަން ހިނގައިދިޔަ ގޮތް ތަހުގީގުކުރުމަށްޓަކައި ފޮރެންސިކް ޓީމަކާއި ތަހުގީގު ޓީމެއް މަކުނުދޫގައި އަންނަނީ ހަރަކާތްތެރިވަމުން
މަކުނުދޫގައި ގޭސް ސިލިންޑަރެއް ގޮވުން
ހދ. މަކުނުދޫގައި ގޭސް ސިލިންޑަރެއް ގޮވައި، ދެ މީހަކު މަރުވި ހާދިސާއާ ގުޅިގެން ފޮރެންސިކް ޓީމަކާއި ތަހުގީގު ޓީމެއް އެރަށަށް ގޮސްފައިވާކަމަށް، ދިވެހި ފުލުހުންގެ ޚިދުމަތުން ބުނެފިއެވެ.
މަކުނުދޫގައި ގޭސް ސިލިންޑަރެއް ގޮވާފައިވަނީ ހޮނިހިރު ދުވަހުގެ ހަވީރުއެވެ. މިހާދިސާ މަރުވި ދެމީހުންގެ ހަށިގަނޑުގެ ބައިތައް ވަރަށް ދުރަށް ވިއްސައިގެން ދިޔަކަމަށް މަންޒަރު ދުށް މީހުން މައުލޫމާތު ދީފައިވެއެވެ.
ފުލުހުން ބުނީ މިކަން ހިނގައިދިޔަ ގޮތް ތަހުގީގު ކުރުމަށްޓަކައި، ކުޅުދުއްފުށިން ފޮރެންސިކް ޓީމަކާއި ތަހުގީގު ޓީމެއް މަކުނުދޫގައި ހަރަކާތްތެރިވަމުން އަންނަކަމަށެވެ.
ފުލުހުން ބުނީ ގޮވާފައިވަނީ މަކުނުދޫ މަސް މާރުކޭޓް ކައިރީގައި އޮތް ގޭސް ސިލިންޑަރެއްކަން، މިހާތަނަށް ބެލިބެލުމުން އެނގިފައިވާކަމަށެވެ. މިހާދިސާގައި ނިޔާވެފައިވަނީ މަކުނުދޫ އެއަރޕޯޓް ބިން ހިއްކުމުގެ މަސައްކަތް ކުރަމުންދާ ކުންފުނީގެ ދެ މުވައްޒަފުންކަމަށް ފުލުހުން ބުނެއެވެ.
