ކުށުގެ ތުހުމަތުގައި ޕޮލިސްޓޭޝަނަށް ހާޒިރުކުރި މީހަކު އެ ސްޓޭޝަނަށް ގެއްލުން ދީފިއެވެ.

މި މައްސަލާގައި ހައްޔަރުކޮށް، ބަންދުކޮށްފައިވަނީ މއ. މާކަރީގެ، ނަބާހް ބުންޔާމީން އަބްދުލްކަރީމް (22އ) އެވެ. ބަންދުގައި ބެހެއްޓުމަށް އަމުރުކުރި ސަބަބުގެ ގޮތުގައި ބުނެފައިވަނީ، އޭނާއާއި އިތުރު މީހަކު ކުށެއްގެ ތުހުމަތުގައި މާފަންނު ޕޮލިސް ސްޓޭޝަނަށް ގެންދެވިފައި ވަނިކޮށް، ސްޓޭޝަންގައި ހުރި ޕާޓިޝަނުގައި ފައިން ޖަހައި، ގާތްގަނޑަކަށް 1 ފޫޓެއްހާ ތަން ފަޅާލައި، މުދަލަށް ގެއްލުން ދިންކަމަށް ކުރެވޭ ތުހުމަތު ކަމަށެވެ.

އަދި ބަންދުގައި ބަހައްޓަންޖެހޭ ހާލަތެއްގެ ގޮތުގައި ބުނެފައިވަނީ، ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 49 ވަނަ މާއްދާއާއި، ގާނޫނު ނަންބަރު 12/2016 (ޖިނާއީ އިޖުރާއަތުގެ ގާނޫނު)ގެ 59 ވަނަ މާއްދާއާއި 60 ވަނަ މާއްދާގެ (ބ)އަށް ރިއާޔަތްކޮށް ކަމަށް، ބަންދު އަމުރުގައި ބުނެފައިވެއެވެ.

ބަންދުގައި ބަހައްޓަންޖެހޭ ހާލަތް އޮތްކަމަށް ދެކޭ ސަބަބުގެ ގޮތުގައި ބުނެފައިވަނީ މުޖްތަމައުގެ ސަލާމަތާއި ރައްކާތެރި ކަމަށްޓަކައި ކަމަށެވެ. އަދި ޝަރީއަތްކުރުމާބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގެ (ނ)ގެ (1) އަދި (3)ގައި ވާ ކަންކަން ފުރިހަމަވާކަމަށް ބުނެފައިވެއެވެ.

އޭނާގެ ބަންދަށް ކްރިމިނަލް ކޯޓުން ޖަހައިދީފައިވަނީ 3 ދުވަހުގެ މުއްދަތެވެ.