ފޯވާޑް މުހައްމަދު ސަލާހު ޖެހި ލަނޑުން, ދިހަ ކުޅުންތެރިންނާއެކު ކުޅެން ޖެހުނު އެވަޓަންގެ މައްޗަށް ލިވަޕޫލް ކުރިހޯދައިފިއެވެ.

ލިވަޕޫލްގެ ދަނޑުގައި ކުޅުނު މެޗު އެޓީމުން ކާމިޔާބުކުރީ 2-0ންނެވެ. މެޗުގެ ފުރަތަމަ ހާފްގައި، 37 ވަނަ މިނިޓުން ފެށިގެން އެވަޓަން ކުޅެން ޖެހުނީ އެއް ކުޅުންތެރިއަކު މަދުކޮށެވެ. އެއީ ދެވަނަ ރީނދޫކާޑާއެކު ޔަންގްއަށް ރަތްކާޑު ދެއްކުމުންނެވެ. އޭނާއަށް ދެފަހަރުވެސް ކާޑު ދެއްކީ ލުއިސް ޑިއާޒްއަށް ފައުލް ކުރުމުންނެވެ. މެޗުގެ ބޮޑުބައި، އެވަޓަންއިން ދިހަ ކުޅުންތެރިންނާއެކު ކުޅެން ޖެހުނަސް ލިވަޕޫލަށް ފުރަތަމަ ގޯލް ޖެހުނީ މެޗު ނިމެން 15 މިނިޓަށް ވެފައިވަނިކޮށް ލިބުނު ޕެނަލްޓީއަކުންނެވެ. ޕެނަލްޓީ ކާމިޔާބުކުރީ ސަލާހުއެވެ. އެއީ މައިކަލް ކީން އަތުގައި ބޯޅަ ޖެހުމުން ދިން ޕެނަލްޓީއެކެވެ. ޕެނަލްޓީ ދިނީ ވީއޭއާރުން ޔަގީން ކުރުމަށްފަހުއެވެ. ސަލާހު ދެވަނަ ލަނޑެއް ޖެހީ މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގެ ތެރެއިންވެސް ހަތްވަނަ މިނިޓުގައެވެ. މިއީ ކެރިއަރުގައި ސަލާހުގެ 207 ވަނަ ގޯލެވެ.

މިމޮޅާއެކު ލިވަޕޫލް ވަނީ 20 ޕޮއިންޓާއެކު ތާވަލްގެ އެއްވަނާގައެވެ. އެއީ 9 މެޗުންނެވެ. ދެވަނާގައި އޮތް ޓޮޓެންހަމާއި ތިންވަނާގައިވާ އާސެނަލްވެސް އޮތީ 20 ޕޮއިންޓާއެކުއެވެ. އެ ދެ ޓީމް ކުޅެފައިވަނީ އަށް މެޗެވެ.