ނޭމާ އިންޖަރީވެއްޖެ, ނޭމާގެ އަނިޔާ ސީރިއަސް, ނޭމާ ހަ މަހަށް ކުޅުމާ ދުރަށް، ނޭމާ ފިޓެއްނޫން، ނޭމާއަށް އަނެއްކާ ވެސް އަނިޔާވެއްޖެ, މިއީ ފާއިތުވެދިޔަ ފަސް އަހަރު ދުވަހުގެ ތެރޭގައި ބްރެޒިލްގެ ތަރި ނޭމާ ސަންޓޯސްއާއި ބެހޭ ގޮތުން މީޑިއާތަކުން އެންމެ ގިނައިން ދެއްކި ވާހަކަ ތަކެވެ.

ތެދެކެވެ. އޭނާ އަށް އަނެއްކާ ވެސް މިވަނީ އަނިޔާވެފަ އެވެ. ކުރީގެ އަނިޔާތައް މުޅިން ފިލައިނުދަނީސް އަނެއްކާ ވެސް ބަލި އެނދަށް ދާން މަޖުބޫރުވީ ވޯލްޑްކަޕް ކޮލިފައިންގައި ގައުމީ ޓީމަށް ކުޅެނިކޮށެވެ.

އަވަސް އަވަހަށް ނޭމާއަށް ދިމާވާންފެށި އަނިޔާތައް ފެށުނީ ދުނިޔޭގެ ރެކޯޑް ފީއަކަށް ބާސެލޯނާ ދޫކޮށް، ފްރާންސްގެ ޕީއެސްޖީ އަށް ދިޔަ ހިސާބުންނެވެ. އޭގެފަހުން ނޭމާ އަށް ރަނގަޅަށް ހަމަނޭވާ ނުލެވެއޭ ބުނުމަކީ ދޮގަކަށްނުވާނެ އެވެ. ދަނޑުބޭރުގެ އަހުލާގީ މައްސަލަ ތަކާވެސްއެކު އަބަދުހެން އުޅެން ޖެހުނީ ކޮންމެވެސް ކަމަކަށް ފަރުވާކުރާށެވެ.  އޭނާގެ ކުޅުން ދުވަހެއް ދުވަހަކަށް ދިޔައީ ދަށްވަމުންނެވެ. ސައުދީ އަރަބިއާގެ އަލް ހިލާލަށް މި ސީޒަން ފެށުމުގެ ކުރިން 98.6 މިލިއަން ޑޮލަރަށް އޭނާ ބަދަލުވީ ޕީއެސްޖީގެ މެނޭޖްމަންޓާއި ސަޕޯޓަރުން އޭނާ އެކުލަބު ދޫކޮށްލަން ޕްރެޝަރު ކުރުމުންނެވެ. ސައޫދީ އަށް ދާން މަޖުބޫރުވީ ޔޫރަޕުގައި އޭނާ ގެންދާނެ ކުލަބެއް ނެތުމުންނެވެ. ސަބަބަކަށްވީ ގާތްގާތުގައި އަނިޔާވުމާއި، އޭނާ އަށް ދޭންޖެހޭ މުސާރަ އާއި އެކަށީގެންވާ ކުޅުމެއް ނުދެއްކޭތީ އެވެ.

ތަފާސް ހިސާބަށް ބަލާއިރު 2018އިން ފެށިގެން ފާއިތުވެދިޔަ ހަތް ސީޒަނުގައި މިހާތަނަށް 16 ފަހަރު ނޭމާ އަށް އަނިޔާވެއްޖެ އެވެ. މިއީ ދުވަހުން ބަލާނަމަ 640 ދުވަސް ނުވަތަ ގާތްގަނޑަކަށް ދެ އަހަރު ބޯޅައާ ނުކުޅެ ހުންނަންޖެހުނު މުއްދަތެކެވެ.

· ފެބްރުއަރީ 2018: ކަނާތު ފައިތިލައަށް އަނޔާވެ 100 ދުވަހު ކުޅުމާ ދުރުގައި ހުންނަން ޖެހުނު

· ޖެނުއަރީ 2019: ވާތު ކުޑަވާ އިނގިއްޔަށް އަނިޔާވެ 88 ދުވަހު ކުޅުމާ ދުރުގައި ހުރި.

· އޭޕްރީލް 2019: ކަނާތު ކަކުލަށް އަނިޔާވެ 90 ދުވަހު ނުކުޅެ ހުންނަންޖެހުނު

· 2019/20 ސީޒަން: ތަފާތު އަނިޔާތަކުގައި 45 ދުވަހު ނުކުޅެ ހުންނަންޖެހުނު.

މި ފަހަރުގެ އަނިޔާގެ ސަބަބުން 31 އަހަރުގެ ނޭމާ އަށް އެއްކޮށް ކުޅުމާ ދުރަށް ދާން ޖެހިދާނެ ކަމުގެ ބިރުވަނީ ހީވެފަ އެވެ. އެކަމަކު އިންސްޓަގްރާމުގައި ތިބި އޭނާގެ 215 މިލިއަން ފޮލޮވަރުން ދަނީ އަވަސް ޝިފާއަށް އެދެމުންނެވެ.