އިސްރާއީލުން ޣައްޒާއަށް ދެމުންދާ ހަމަލާތަކުގައި ޝަހީދުވި މީހުންގެ އަދަދު 4000ން މައްޗަށް
ޣައްޒާއިން މަރުވި މީހުންގެ ތެރޭގައި 1524 ކުޑަކުދިންނާއި 1000 އަންހެނުންނާއި 11 ނޫސްވެރިން ހިމެނޭ
ޣައްޒާއަށް އިސްރާއީލުން ދެމުންދާ ހަމަލާތަކުގައި އެތައް ބަޔަކު އަންނަނީ ޒަޚަމްވަމުން
އޮކްޓޯބަރ މަހުގެ 7 ވަނަ ދުވަހުން ފެށިގެން ހިނގަމުންދާ ފަލަސްތީނު އިސްރާއީލު ހަނގުރާމައިގައި މިހާތަނަށް އައިއިރު ޣައްޒާއިން ޝަހީދުވި މީހުންގެ އަދަދު 4137ށް އަރާފައިވާކަމަށް ފަލަސްތީނުގެ ހެލްތު މިނިސްޓްރީން ހާމަކޮށްފިއެވެ.
މީގެތެރޭގައި 1524 ކުޑަކުދިންނާއި 1000 އަންހެނުންނާއި 11 ނޫސްވެރިން ހިމެނެއެވެ. ޣައްޒާއަށް އިސްރާއީލުން ދެމުންދާ ހަމަލާތަކުގައި ޒަޚަމްވި މީހުންގެ އަދަދު ވަނީ 13،000ށް އަރާފައެވެ. މީގެތެރޭގައި 2000 ކުޑަކުދިންނާއި 1400 އަންހެނުން ހިމެނެއެވެ. މީގެއިތުރުން އިސްރާއީލުން ހުޅަނގު އައްސޭރިއަށް ދެމުންދާ ހަމަލާތަކުގައި 81 މީހަކު ޝަހީދުވެފައިވާއިރު 1300 މީހުން ވަނީ ޒަޚަމްވެފައެވެ. އަދި 860ށް ވުރެ ގިނަ މީހުން އިސްރާއީލުން ވަނީ ހައްޔަރުކޮށްފައެވެ.
ފަލަސްތީނުން އިސްރާއީލަށް ދެމުންދާ ހަމަލާތަކުގައި މަރުވި މީހުންގެ އަދަދަކީ 1403 އެވެ. އަދި ޒަޚަމްވި މީހުންގެ އަދަދަކީ 4629އެވެ. ހަމާސް އިން އަސީރުންގެ ގޮތުގައި އިސްރާއީލުން ހައްޔަރުކޮށްގެން ގެންގޮސްފައިވަނީ 203 މީހުންނެވެ.
ހަނގުރާމައަށް 15 ދުވަސްވެފައިވާއިރު އިސްރާއީލުން ވަނީ ޣައްޒާއަށް ފެނާއި ކާނާއި ތެލާއި ގޭހާއި މިނޫންވެސް ޒަރޫރީތަކެތި އެތެރެކުރުން އެއްކޮށް ހުއްޓުވާފައެވެ. ރަފަހް ބޯޑަރު ހުކުރު ދުވަހު ހުޅުވާލެވޭނެކަމަށް ކުރިން ބެލެވުނުނަމަވެސް އަދި މަދުވެގެން ދެ ދުވަސް ނަގާނެކަމަށް މިހާރު ވަނީ ބެލެވިފައެވެ.
ޣައްޒާގެ އާބާދީއަކީ 2.3 މިލިއަނެވެ. މީގެތެރެއިން 1.7 މިލިއަން މީހުން ދިރިއުޅެމުން އަންނަނީ ރެފިޔުޖީ ކޭމްޕްތަކުގައެވެ.
