އިސްލާމީ ގައުމުތަކުން އިސްރާއީލަށް ދަތިކުރުމުގެ ފިޔަވަޅު އެޅުމަށް އިރާނުން ގޮވާލައިފި
19 އޮކްޓޯބަރު 2023 | ބުރާސްފަތި 00:40އިސްރާއީލަށް ތެޔޮ ފޯރުކޮށްދިނުން ހުއްޓާލުމަށާއި ދަތިކުރުމުގެ އިތުރު ފިޔަވަޅުތައް އެޅުމަށާއި ގައުމުތަކުގައި ތިބި އިސްރާއީލުގެ ސަފީރުން ފޮނުވާލުމަށް އިރާނުން ގޮވާލި
އިރާނުގެ ފޮރިން މިނިސްޓަރ ހުސައިން އާމިރު އަބްދުﷲހިއަން
އޯރގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގައި ހިމެނޭ ގައުމުތަކުން އިސްރާއީލަށް ތެޔޮ ފޯރުކޮށްދިނުން ހުއްޓާލުމަށާއި ދަތިކުރުމުގެ އިތުރު ފިޔަވަޅުތައް އެޅުމަށާއި ގައުމުތަކުގައި ތިބި އިސްރާއީލުގެ ސަފީރުން ފޮނުވާލުމަށް އިރާނުގެ ފޮރިން މިނިސްޓަރ ހުސައިން އާމިރު އަބްދުލް ހަޔާން ގޮވާލައްވައިފިއެވެ.
ސައުދީ އަރަބިއްޔާގެ ޖިއްދާގައި އިސްރާއީލާއި ފަލަސްތީނާއި ދެމެދު ހިނގަމުންދާ ހަނގުރާމައާ ގުޅިގެން ބޭއްވި އޯއައިސީގެ އެމަރޖެންސީ ބައްދަލުވުމުގައި އިރާނުގެ ފޮރިން މިނިސްޓަރ މިމޭރުމުން ބަޔާން ދެއްވާފައިމިވަނީ ގައްޒާގެ ހޮސްޕިޓަލަކަށް އަމާޒުކޮށް އިސްރާއީލުން ދިން ހަމަލާއާ ގުޅިގެންނެވެ.
މިހާރުން މިހާރަށް އިސްރާއީލާ ދެކޮޅަށް ދަތިކުރުމުގެ ފިޔަވަޅު އެޅުމަށް އިރާނުގެ ފޮރިން މިނިސްޓަރގެ ބަޔާނުގައި ވަނީ ގޮވާލައްވާފައެވެ. މީގެއިތުރުން އިސްލާމީ ލޯޔަރުންގެ ޓީމެއް ގާއިމުކޮށް އިސްރާއީލުން ގައްޒާގައި ހިންގަމުންދާ ހަނގުރާމައިގެ ޖަރީމާތައް ޑޮކިޔުމަންޓްކުރުމަށްވެސް އިރާނުން ވަނީ ގޮވާލާފައެވެ.
އަންގާރަ ދުވަހުގެ ރޭ އިސްރާއީލުން ވައިގެ މަގުން ގައްޒާގައި ހުރި ހަމައެކަނި ކްރިސްޓިއަން ހޮސްޕިޓަލްކަމުގައިވާ އަލް އަހްލީ އަރަބް ހޮސްޕިޓަލަށް ދިން ހަމަލާގައި މަދުވެގެން 500 މީހުން ޝަހީދުކޮށްލާފައިވާކަމަށް ފަލަސްތީނުން ބުނެއެވެ. މިއީ އޮކްޓޯބަރ މަހުގެ 7 ވަނަ ދުވަހު ފެށި ހަމަލާ ބަދަލުކުރުންތަކުގައި މިހާތަނަށް އިސްރާއީލުން ގައްޒާއަށް ދިން އެންމެ ވަރުގަދަ ހަމަލާއެވެ.
ޣައްޒާގެ ހެލްތު މިނިސްޓްރީގެ ސްޕޯކްސްޕާސަން އަޝްރަފް އަލް ގުދުރީ ވިދާޅުވީ އެތައް ސަތޭކަ ބަޔަކު މަރުވެފައިވާއިރު ވެއްޓިފައިވާ އިމާރާތުގެ ދަށުން އެތައް ސަތޭކަ ބަޔަކު ސަލާމަތްކުރުމުގެ މަސައްކަތްކުރަމުންދާކަމަށެވެ.
ހޮސްޕިޓަލަށް ދިން ހަމަލާއާ ގުޅިގެން މެދު އިރުމަތި އަދި އުތުރު އެފްރިކާގައި ވަނީ އިސްރާއީލާ ދެކޮޅަށް އަޑުއުފުލުމުގެ ހަރަކާތް ވަރަށް ބޮޑަށް ފުޅާވެފައެވެ. އަދި މިހަރަކާތުގެ ތެރެއިން އުރުދުން އަދި ތުރުކީގައި ހުރި އިސްރާއީލު އެމްބަސީ ކައިރިއަށް އެއްވެފައިވާއިރު ލުބުނާންގައި ހުންނަ އެމެރިކާ އެމްބަސީ ކައިރިއަށްވެސް މީހުން އެއްވެފައިވެއެވެ.
މީގެއިތުރުން އިރާން، މޮރޮކޯ، ޓިއުނީޝިއާ، ޔަމަން އަދި އިރާގުގައިވެސް އަންނަނީ އިސްރާއީލާ ދެކޮޅަށް އަޑުއުފުލަމުންނެވެ.
