ގައުމީ ޓީމުގެ ގޯލްކީޕަރު ޓްރެއިނަރުކަމާ އަމިއްލައަށް ދުރުވި އަސްލަމް އަބްދުއްރަހީމް, ދެވަނަ ޑިވިޝަންގައި ވާދަކުރާ ނިއުރޭޑިއަންޓުގެ ގޯލްކީޕަރު ޓްރޭނަރުކަމާ ހަވާލުވެއްޖެއެވެ.

ކުރިން ނިއުރޭޑިއަންޓުގެ ގޯލް ބަލަހައްޓައި, އެކްލަބާއެކު ކާމިޔާބުހޯދި އަސްލަމް ވަނީ އަންގާރަ ދުވަހުގެރޭ ފެށި ނިއުރޭޑިއަންޓްގެ ޕްރެކްޓިހަށް ނިކުމެފައެވެ. ރާއްޖޭގެ އެންމެ އިތުބާރު ގޯލްކީޕަރު ޓްރޭނަރު މިފަހުން ފެނުނީ ގައުމީ ޓީމްގެ އިތުރުން އީގަލްސްގެ ގޯލްކީޕަރުން ތަމްރީނުކުރުމުގައެވެ. ގައުމީ ޓީމާ ދުރަށްދިޔައީ ގައުމީ ޓީމުން މުސާރަ ނުދޭތީކަމަށް، އިތުބާރުހުރި ގޮތެއްގައި މައުލޫމާތު ލިބިފައިވެއެވެ. އޭނާގެ އެހީއަށް ރާއްޖޭގެ އެންމެ ކާމިޔާބު ކްލަބް ނިއުރޭޑިއަންޓުން އެދުމުން އެފުރުސަތުގެ ބޭނުންހިފީއެވެ.

އަލުން ފުރަތަމަ ޑިވިޝަންގެ ޖާގަ ހޯދަން މަސައްކަތްކުރާ ނިއުރޭޑިއަންޓުގެ ގޯލް ކީޕަރަކަށް ހަމަޖައްސާފައިވަނީ ޕާކިސްތާނުގެ ބަދަލު ކީޕަރު ބާސިތެވެ. ރާއްޖޭގައި ކުޅެމުން އައި ސްރީލަންކާގެ ގައުމީ ކީޕަރު ސުޖަން އެންމެ ބޮޑު ކުރިއެރުމެއް ހޯދީ އަސްލަމްގެ އެހީ ލިބިގެންނެވެ. އެހެންކަމުން އަސްލަމް ނިއުރޭޑިއަންޓާ ގުޅުމަކީ އެ ކްލަބް އަލުން މަގާމަށް ދިއުމަށް ކުރާ މަސައްކަތަށް ލިބުނު ބޮޑު ކުރިއެރުމެއްކަމަށް ކްލަބުން ދެކެއެވެ. އަސްލަމްގެ ކުޅުމުގެ ކެރިއަރު ގުޅިފައި އޮތީ ނިއުރޭޑިއަންޓުގެ އިތުރުން ވެލެންސިޔާއާއެވެ.

ނިއުރޭޑިއަންޓުގެ ކޯޗިންގ ޓީމްގައި އަސްލަމްގެ އިތުރުން ހިމެނެނީ ކޯޗު އަހުމަދު ނިމާދު (ނިމާ)އާއި ކްލަބްގެ ކުރީގެ ކުޅުންތެރިޔާ ފަރުހާދު އިސްމާއީލް (ފަރޭ)އެވެ.