އޮސްޓްރޭލިއާގެ ގޯލްކީޕަރު ލޭންގަރޭކް ކޮރޯނާވައިރަހަށް ޕޮޒިޓިވް ވެއްޖެ

ޖަޕާނުގެ ނަގޯޔާ ގްރެމްޕަސްއަށް ކުޅެމުން އަންނަ އޮސްޓްރޭލިއާގެ ގޯލްކީޕަރު މިޗެލް ލޭންގަރޭކް ކޮރޯނާވައިރަސް (ކޮވިޑް-19) އަށް ޕޮޒިޓިވް ވެއްޖެ އެވެ.

އުމުރުން 31 އަހަރުގެ ގޯލްކީޕަރު ކޮވިޑް-19ށް ޕޮޒިޓިވް ވިކަން ޖަޕާނުގެ ޖޭ-ލީގުގައި ވާދަކުރަމުން އަންނަ ނަގޯޔާ ގްރެމްޕަސްއިން ވަނީ ހާމަކޮށްފަ އެވެ. ލޭންގަރޭކް އަކީ ނަގޯޔާ ގްރެމްޕަސްއިން ކޮވިޑް-19ށް ޕޮޒިޓިވްވި ދެވަނަ ކުޅުންތެރިޔާ އެވެ. މިދިޔަ ހަފުތާގެ ތެރޭގައި އެ ކްލަބުގެ ފޯވަރޑް މޫ ކަނަޒާކީވެސް ވަނީ ކޮވިޑް-19ށް ޕޮޒިޓިވް ވެފައެވެ.

ނަގޯޔާ ގްރެމްޕަސްއިން ނެރުނު ބަޔާނެއްގައި ބުނީ ހޮނިހިރު ދުވަހު އެ ކްލަބުގެ 26 ކުޅުންތެރިން ކޮވިޑް-19ށް ޓެސްޓު ކުރިއިރު، ވައިރަހަށް ޕޮޒިޓިވްވީ ލޭންގަރޭކް އެކަނި ކަމަށެވެ. އަދި ލޭންގަރޭކް ވައިރަހަށް ޕޮޒިޓިވް ވީއިރު، އޭނާގެ ހަށިގަނޑުން ވައިރަހުގެ އެއްވެސް އަލާމާތެއް ފެނިފައިނުވާ ކަމަށްވެސް އެ ކްލަބުން ވަނީ ބުނެފައެވެ.

މީގެ ކުރިން ޖަރުމަންގެ ބޮރޫޝިއާ ޑޯޓްމުންޑާއި ސްޓުޓްގާޓަށްވެސް ކުޅެފައިވާ ލޭންގަރޭކް ނަގޯޔާ ގްރެމްޕަސްއާ ގުޅުނީ 2018 ވަނަ އަހަރު އެވެ. އޭނާ ވަނީ މިހާތަނަށް ނަގޯޔާ ގްރެމްޕަސްއަށް 72 މެޗު ކުޅެދީފަ އެވެ. އަދި އޮސްޓްރޭލިއާ ގައުމީ ޓީމަށް އަށް މެޗު ލޭންގަރޭކް ކުޅެދިންއިރު، އެ އަށް މެޗުންވެސް އެޓީމު ވަނީ މޮޅުވެފަ އެވެ.

ލޭންގަރޭކް އެންމެ ބޮޑަށް ވިދާލީ ޑޯޓްމުންޑުންނެވެ. އެގޮތުން އޭނާ ވަނީ ޑޯޓްމުންޑާއެކު ޖަރުމަން ލީގު ދެ ފަހަރު ކާމިޔާބުކުރުމުގެ އިތުރަށް، ޔުއެފާ ޗެމްޕިއަންސް ލީގުގެ ރަނަރަޕްކަން ހޯދާފަ އެވެ.

ކޮވިޑް-19 އާ ގުޅިގެން ޖޭ-ލީގުވެސް މެދުކަނޑާލިއިރު، ހަތަރު މަހަށްފަހު ލީގު އަލުން ފެށުމަށް މިހާރު ތާވަލުކޮށްފައި ވަނީ އަންނަ ޖުލައި މަހުގެ ކުރީކޮޅު އެވެ.