ޕީއެސްޖީ އިން ނޭމާއާ އެކު އެއްބަސްވުމަކާ ގަތަށް

ފްރާންސްގެ ޕެރިސް ސެއިންޓް ޖާމެއިން (ޕީއެސްޖީ) އާއި ނޭމާ އެއްބަސްވުމަކާ ގާތަށް އައިސްފައިވާ ކަމަށް މީޑިއާ ރިޕޯޓްތައް ބުނެފިއެވެ.

ބޭރުގެ ކުޅިވަރު ޚަބަރު ފަތުރާ މީޑިއާއެއް ކަމަށްވާ އީއެސްޕީއެން އިން ރިޕޯޓްކޮށްފައިވާ ގޮތުގައި، ޕީއެސްޖީން ވަނީ ނޭމާއާއި އޭނާގެ ބައްޕައާ އެކު ސިލްސިލާ ބައްދަލުވުންތަކެއް ބާއްވައި ކޮންޓްރެކްޓަކާ ގާތަށް ޖެހިލާފައެވެ. ރިޕޯޓްގައި ވާގޮތުން ޕީއެސްޖީ އިން ވަނީ ބާސާއާ އެކު ނޭމާ ހަދާފައިވާ އެއްބަސްވުން އުވާލުމަށް ބޭނުންނާ 222 މިލިއަން ޔޫރޯ ހުށަހެޅުމަށް ތައްޔާރުވެފައެވެ.

މީޑިއާ ރިޕޯޓްތައް ބުނާ ގޮތުން ޕީއެސްޖީއިން ނޭމާއާ އެކު މަޝްވަރާ ކުރަމުން އަންނަނީ މަދުވެގެން 4 އަހަރު ދުވަހުގެ އެއްބަސްވުމަކަށެވެ. އެގޮތުން އެކުލަބުން ނޭމާއަށް ހުށަހެޅުމަށް ތައްޔާރުވަމުން އަންނަނީ އަހަރު 30 މިލިއަން ޔޫރޯގެ ކޮންޓްރެކްޓެއް ކަމަށް ވެސް ރިޕޯޓްގައި ވެއެވެ. މި ވަގުތު ބާސާގެ ޕްރީ ސީސަންގައި ފަރިތަކުރުންތައް ކުރިއަށް ގެންދާ ނޭމާ، ބާސާގެ ބައެއް ކުޅުންތެރިން ގާތުގައި ވެސް އޭނާ ކުލަބު ދޫކޮށްލަން އުޅޭ ކަމަށް ބުނެފައިވާ ކަމަށް އީއެސްޕީއެން އިން ވަނީ ރިޕޯޓްކޮށްފައެވެ.

މި ވާހަކަތަކަށް ރައްދު ދިނުމުގެ ގޮތުން ބާސާގެ ރައީސް ޖޯސެފް މާރިއޯ ބާޓޮމެއު ވިދާޅުވެފައި ވަނީ، ޕީއެސްޖީ އިން ނޭމާ ހޯދަން ބޭނުންވާ ނަމަ ފީފާގެ ފެއާ ޕްލޭ ފައިނޭންޝަލް ގަވާއިދާ ހިލާފުވުން ނޫން އެހެން ގޮތެއް ޕީއެސްޖީއަކަށް ނެތް ކަމަށެވެ.

ޕީއެސްޖީއިން މިހަފަރުގެ ޓްރާންސްފާގައި ސްކޮޑް ވަރުގަދަކުރުމަށް މަސައްކަތް ކުރަމުން އަންނައިރު، އެކުލަބުން ވަނީ ކުރިން ބާސާއަށް ކުޅުނު ޑެނި އަލްވޭސް ވެސް ހޯދާފައެވެ. އަދި އާސެނަލް އަށް މިހާރު ކުޅެމުން އަންނަ އެލްކްސިސް ސަންޗޭސް ހޯދުމަށް ވެސް މަސައްކަތް ކުރަމުން އަންނަ ކަމަށް މީޑިއާ ރިޕޯޓްތައް ބުނެއެވެ.

އުފަން ގައުމު ބްރެޒިލްގެ ސަންތޯސްގައި މޮޅު ކުޅުމެއް ދެއްކުމަށް ފަހު 2013 ވަނަ އަހަރު ބާސާއާ ގުޅުނު ފަހުން މިހާތަނަށް އެކުލަބަށް ކުޅުނު 186 މެޗުގައި ނޭމާ ވަނީ 105 ލަނޑު ކާމިޔާބުކޮށްފައެވެ.