ފަލަސްތީނުގެ ރައްޔިތުންނަށް އެހީވުމަށް ކޭކް ޑޯނާރޒް އިން ފުލް ޑޭ އިވެންޓްއެއް ބާއްވަނީ
15 އޮކްޓޯބަރު 2023 | އާދީއްތަ 12:47މާލެ އަދި ހުޅުމާލޭގެ 8 ސަރަހައްދެއްގައި ހެނދުނު 7ން އިރުއޮއްސި 6ށް ކުރިއަށްދާނެ
ކޭކް ޑޯނާރޒް ގެ އިސްވެރިން
ފަލަސްތީނުގެ ރައްޔިތުންނަށް އެހީވުމަށް ކޭކް ޑޯނާރޒް އިން ފުލް ޑޭ އިވެންޓެއް ބާއްވަން ނިންމައިފިއެވެ.
އާދިއްތަ ދުވަހު ރާއްޖެޓީވީގެ 'ފަސްކާފު' ޕްރޮގްރާމްގައި ވާހަކަދައްކަވަމުން ކޭކް ޑޯނާރޒް ގެ އިވެންޓް މެނޭޖަރ ހަލީމަތު ޝިޒްނާ ވިދާޅުވީ، 17 އޮކްޓޯބަރު ވާ އަންގާރަ ދުވަހު އެ ޖަމިއްޔާގެ ފަރާތުން ފަލަސްތީނުގެ ރައްޔިތުންނަށް އެހީވުމަށް ފުލް ޑޭ އިވެންޓެއް ކުރިއަށް ގެންދިއުމަށް ނިންމާފައިވާކަމަށެވެ.
މި އިވެންޓް މާލެ އަދި ހުޅުމާލޭގެ 8 ސަރަހައްދެއްގައި ހެނދުނު 7ން އިރުއޮއްސި 6ށް ކުރިއަށްދާނެކަމަށް ޝިޒްނާ ފާހަގަކުރެއްވިއެވެ. އެގޮތުން، މާލޭގެ އެމްޕީއެލް ސަރަހައްދު، ހުޅުމާލޭގެ ކުރީގެ ފެރީ ޓާރމިނަލް ޖެޓީ ސަރަހައްދު، ރަސްފަންނު، ރާޅުގަނޑު ސަރަހައްދު، ފޭސް 2 ގެ ހިޔާ ފްލެޓް ޕާކިން އޭރިޔާ، ހުޅުމާލެ ފޭސް 1 އަދި ސެންޓަރަލް ޕާކް ސަރަހައްދުގައި މި އިވެންޓް ކުރިއަށްދާނެކަމަށް ޝިޒްނާ ވިދާޅުވިއެވެ.
މިއީ ފަންޑް ރައިޒިންގް އިވެންޓެއް ކަން ފާހަގަކުރައްވާ ޝިޒްނާ ވިދާޅުވީ، ކޭކް ޑޯނާރޒްގެ ކުރީގެ އިވެންޓްތަކާއި އެއްގޮތަށް މި އިވެންޓްގައިވެސް ވިއްކާނީ އެކި ކަހަލަ ކާބޯތަކެތިކަމަށެވެ. އެގޮތުން، ކޭކް އަދި އެކި ކަހަލަ މީލް ޕްކެސް ލިބެން ހުންނާނެކަމަށް އޭނާ ފާހަގަކުރެއްވިއެވެ.
މި އިވެންޓްގައި ވީހާވެސް ގިނަ ފަރާތްތައް ބައިވެރިވެ ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދިނުމަށް ކޭކް ޑޯނާރޒް އިން ވަނީ އެދިފައެވެ.
މީގެއިތުރުން، މި ހަރަކާތުގައި އާންމުން ބައިވެރިވުމުގެ ފުރުސަތު އަދިވެސް އޮތްކަން ފާހަގަކުރައްވާ ޝިޒްނާ ވިދާޅުވީ، ވޮލެންޓިއަރކޮށް ހަރަކާތްތެރިވުމާއި ޑޮނޭޓް ކުރުމުގެ ފުރުސަތުވެސް ހުޅުވާލެވިފާވާކަމަށެވެ.
