އެފްއޭއެމްގެ ރައީސް ކަމަށް ދަގަނޑޭ ވާދަކުރަނީ

އަންނަ އަހަރު އޮންނަ އެފްއޭއެމުގެ އިންތިހާބުގައި ވާދަކުރަން ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގް (ދަގަނޑޭ) ތައްޔާރުވެއްޖެ އެވެ.

މިގޮތުން "ދަގަނޑޭ ފޮރ އެފްއޭއެމް" ނަމުގައި ހާއްސަ ފޭސް ބުކް ޕޭޖެއް ވަނީ އުފައްދައި މިއަދު ވަނީ ހިންގަން ފަށައިފަ އެވެ. ނަމަވެސް މިކަމާ ގުޅޭ ގޮތުން ދަގަނޑޭގެ ރަސްމީ ބަހެއް އަދިނެތެވެ. އޭނާގެ މި ފޭސްބުކް ޕޭޖް އެފްއޭއެމުގެ މިހާރުގެ ވައިސް ޗެއާމަން އަދި މާޒިޔާގެ އިސް ހިންގުންތެރިޔާ ހުސައިން ޝާފިއު (ކޮކީ) ވެސް ވަނީ ޝެއާކޮށްފަ އެވެ.

ދަގަނޑޭ އެފްއޭއެމުގެ ރައީސް ކަމުގެ މަގާމަށް ކުރިމަތިލާން ކެމްޕޭން މި ފެށީ އެފްއޭއެމުގެ ހިންގުން ވަރަށް ބޮޑަށް ދަށްވެ، އިދާރާގެ މުވައްޒަފުންނަށް މުސާރަ ނުދެވި ހާލަތު ގޯސްވެފައިވަނިކޮށެވެ.

ރާއްޖޭގެ އެންމެ ބޮޑު ކުޅިވަރު އެސޯސިއޭޝަނުގެ ރައީސް ހޮވާނީ މެމްބަރު ކުލަބުތަކުގެ ވޯޓުންނެވެ. މި ގޮތުން ވޯޓުލާނީ ފުރަތަމަ ޑިވިޝަނުގެ އަށް ކުލަބާއި ދެ ވަނަ ޑިވިޝަނުން ހޮވާލެވޭ ތިން ކުލަބާއި ތިން ވަނަ ޑިވިޝަނުން ހޮވާ ދެ ކުލަބެކެވެ.

އެފްއޭއެމުގެ ރައީސް ކަމުގެ މަގާމުގައި މިހާރު ހުންނެވީ ކުރީގެ ޖެނެރަލް ސެކްރެޓަރީ ބައްސާމް އަދީލް ޖަލީލެވެ. އޭނާ މިހާރު ފުރުއްވަމުން ގެންދަވަނީ ދެ ވަނަ ދައުރެވެ.

ދަގަނޑޭ އަކީ ވެލެންސިއާއިން ފުޓްބޯޅަ ކެރިއަރު ފަށައި ނިއު ރޭޑިއަންޓާއި ވީބީ އަދި މާޒިޔާ އާއި ސަސްގެ އިތުރުން ގައުމީ ޓީމަށް ވެސް ކުޅެ ގިނަ ކާމިޔާބީތަކެއް ހޯދާފައިވާ ކުޅުންތެރިއެކެވެ.