ފްރާންސް ޔޫރޯއަށް ކޮލިފައިވެއްޖެ، ނެދަލެންޑްސް ކޮޅަށް ދެ ލަނޑުވެސް ޖެހީ އެމްބާޕޭ
ފްރާންސް ވަނީ މިހާތަނަށް ކުޅުނު ހަ މެޗު ވެސް ކާމިޔާބުކޮށްފަ
ފްރާންސްގެ ފުރަތަމަ ލަނޑު ޖެހުމަށްފަހު އެމްބާއްޕޭ؛ ފޮޓޯ-ރޮއިޓަރސް
އަންނަ އަހަރު ޖަރމަނީގައި އޮންނަ ޔޫރޯއަށް ފްރާންސް ވެސް ކޮލިފައިވެއްޖެއެވެ.
އަންނަ އަހަރު އޮންނަ ޔޫރަޕިއަން ޗެމްޕިއަންޝިޕްގެ ޖާގައެއް ފްރާންސުން ކަށަވަރުކުރީ ނެދަލެންޑްސް 2-1 ން ބަލިކޮށްގެންނެވެ. މެޗުގައި ފްރާންސްގެ ދެ ލަނޑުވެސް ޖެހީ ކެޕްޓަން ކީލިއަން އެމްބާޕޭއެވެ. އޭނާ ދެހާފްގައި ދެ ލަނޑު ޖަހާ ފްރާންސަށް ދެ ލަނޑުގެ ލީޑެއް ހޯދައިދީފައި ވަނިކޮށް, ނެދަލެންޑްސްގެ ހަމައެކަނި ލަނޑު ޖެހީ ހާޓްމެންއެވެ. ފްރާންސް ޖާގަ ޔަޤީން ކުރީ މިހާތަނަށް ކުޅުނު ހަ މެޗުން މޮޅުވެ, 18 ޕޮއިންޓާއެކުއެވެ. ނެދަލެންޑްސް އޮތީ ނުވަ ޕޮއިންޓާއެކު ގްރޫޕް ބީގެ ތިންވަނާގައެވެ. ދެވަނާގައި އޮތީ 12 ޕޮއިންޓާއެކު ގްރީސްއެވެ.
އަންނަ އަހަރުގެ މުބާރާތުން ޖާގަ މިހާތަނަށް ޔަޤީންކޮށްފައިވަނީ ފްރާންސްގެ އިތުރުން ޕޯޗްގަލްއާއި, ބެލްޖިއަމް އަދި މުބާރާތް ބާއްވާ ގައުމު ޖަރމަނީއެވެ.
