ދިޔަމިގިލި ސްކޫލުގެ 10 ކްލާސްރޫމް އިމަރާތްކުރަން ހަވާލުކޮށްފި
13 އޮކްޓޯބަރު 2023 | ހުކުރު 13:23މިއީ 10.6 މިލިއަން ރުފިޔާގެ މަޝްރޫއެއް
ދިޔަމިގިލި ސްކޫލުގެ މަސައްކަތް ހަވާލު ކުރަނީ
ތ. ދިޔަމިގިލީ ސްކޫލްގައި 10 ކްލާސްރޫމްގެ އިމާރާތެއް ތަރައްގީކުރުމުގެ މަސައްކަތް މިނިސްޓްރީ އޮފް އެޑިއުކޭޝަނުން ބަޔަކާއި ހަވާލުކޮށްފިއެވެ.
މި މަސައްކަތް އެ މިނިސްޓްރީން ހަވާލުކޮށްފައިވަނީ އީކޯ އިންވެސްޓްމެންޓް މޯލްޑިވްސް ޕްރައިވެޓް ލިމިޓެޑާއެވެ. އެކުންފުންޏާއި މިމަސައްކަތް ހަވާލުކޮށްފައިވަނީ 13 މަސްދުވަހުގެ ތެރޭގައި މަސައްކަތް ނިންމާގޮތަށެވެ.
އެޑިއުކޭޝަން މިނިސްޓްރީގައި ބުރާސްފަތި ދުވަހު ބޭއްވި ރަސްމިއްޔާތެއްގައި އެ މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ސީނިއަރ ޕޮލިސީ ޑިރެކްޓަރ ނައުޝާދު އިބްރާހީމެވެ. އަދި އީކޯ އިންވެސްޓްމެންޓްގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރ ފަޒުލީން މުޙައްމަދެވެ.
އެޑިއުކޭޝަނުން މިމަސައްކަތް އީކޯ އިންވެސްޓްމެންޓާ ހަވާލުކޮށްފައިވަނީ 10،686،305.77 (ދިހަ މިލިއަން ހަ ލައްކަ އައްޑިހަ ހަ ހާސް ތިންސަތޭކަ ފަސް ރުފިޔާ ހަތްދިހަ ހަތް ލާރި) އަށެވެ.
ރާއްޖޭގެ އެކި ރަށްތަކުގެ ސްކޫލްތަކަށް ދިމާވެފައިވާ ޖާގައިގެ ދަތިކަން ހައްލު ކުރުމަށް އައު އިމާރާތްތައް ހެދުމުގެ މަސައްކަތްތައް މިހާރު ވެސް ދަނީ ކުރަމުންނެވެ. މި ފާއިތުވި ފަސް އަހަރުގެ ތެރޭގައި ގިނަ ސްކޫލްތަކެއްގެ އައު ކްލާސްރޫމް އިމާރާތްތަކުގެ މަސައްކަތް ނިންމައި ވަނީ ހުޅުވާފައެވެ. މިއާއެކު ބައެއް ސްކޫލްތަކުގެ ކިޔެވުން ވަނީ ދެ ދަންފަޅިން، އެއް ދަންފަޅިއަށް ވެސް ބަދަލުކޮށްފައެވެ.
