ފައިޙްގެ މައްޗަށް ކުރާ ދައުވާ ކުރިއަށް ގެންދިއުމަށް ހުރަހެއް ނެތް، ހެކިބަސް ނަގަން ފަށަނީ

މާރާމާރީގެ މައްސަލައަކާއި ގުޅިގެން ފުލުހުން ހޯދަން އިއުލާނު ކުރިތާ މަސް ދުވަސް ފަހުން އަމިއްލައަށް ފުލުހުންނާއި ހަވާލުވި ސ. މަރަދޫފޭދޫ / ރަށްދެބައިގެ، އިބްރާހީމް ފައިހް ނިޒާމްގެ މައްޗަށް ކުރާ ދައުވާގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 13 ސެޕްޓެމްބަރު 2023 ގައެވެ. އެ ދުވަހު ފައިޙް ވަނީ އޭނާގެ މައްޗަށް ކުރާ ދައުވާތަކަށް އިންކާރުކޮށްފައެވެ.

Advertisement

އޭނާގެ މައްޗަށް އުފުލާފައިވަނީ ޤާނޫނު ތަންފީޒުކުރާ މުވައްޒަފެއްގެ މަަސައްކަތަށް ގަސްތުގައި ހުރަސް އެޅުމުގެ ކުށުގެ ދައުވާއާއި، ގައިގާ އަތްލުމުގެ ކުށުގެ ދައުވާގެ އިތުރުން، ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.

ބުރާސްފަތި ދުވަހުގެ އަޑުއެހުމުގައި ވަނީ މި މައްސަލައިގެ ޝަރީއަތުގެ ކުރީގެ ހުށައެޅުން ހުށައަޅާފައެވެ. އެއީ ދައުވާ ކުރިއަށް ގެންދިއުމަށް ހުރަހަކަށް ވެދާނެފަދަ ދިފާއެއް އޮތްކަމަށް ބުނެ ހުށައަޅާފައިވާ ހުށައެޅުމެކެވެ.

ފައިޙްގެ ވަކީލު ވިދާޅުވީ، އޭނާގެ މައްޗަށް ތުހުމަތު ކުރެވުނީ މީހަކަށް ތޫނު އެއްޗެއް ބޭނުންކޮށްގެން މާރާމާރީ ހިންގުމުގެ ކުށުގައި ކަމަށާއި، ނަމަވެސް ދައުވާކޮށްފައިވަނީ ފުލުހަކަށް ޙަމަލާދިންކަމަށް ބުނެކަމަށެވެ.

އެއީ ހައްޔަރުކުރިއިރު ދިން ޤާނޫނީ އިންޒާރާއި، ތަހުގީގުގައިވެސް ފާހަގަކޮށްފައިވާ ކަމެއް ނޫންކަން ވަކީލު ވިދާޅުވިއެވެ.

އެކަމާ ގުޅޭގޮތުން ދައުލަތުގެ ވަކީލު ވިދާޅުވީ، ފައިޙުގެ ތަހުގީގު ބަޔާނަށް ބަލާއިރު، ދައުވާކޮށްފައިވާ މި ޙާދިސާއާ ގުޅޭ މައުލޫމާތު އޭނާއަށް އެނގޭކަން އެނގެން އޮންނަކަމަށެވެ.

އޭނާ ބޭނުންކޮށްފައިވާ އިބާރާތަށް ބަލާއިރު، "އެއްވެސް މީހެއްގެ ގައިގައިވެސް އަދި ފުލުހެއްގެ ގައިގައިވެސް ޖަަހައި މާރާމާރީ ހިންގާފައިނުވާނެ" ކަމަށް ބަޔާނުގައި ބުނެފައިވާކަން ދައުލަތުން ފާހަގަކުރިއެވެ.

މި މައްސަލައިގައި ދައުލަތުން ޝަރީއަތުގެ ކުރީގެ ހުށައެޅުމެއްގެ ގޮތުގައި ހުށައަޅާފައިވަނީ ސިއްރު ހެކިންގެ ހެކިބަސް ނަގާއިރު ހެކިވެރިންނަަށް ހިމާޔަތް ލިބިދޭ ގޮތަށް ހެކިބަސް ނެގުމަށެވެ.

އެއަށްފަހު ޝަރީއަތުގެ ކުރީގެ ހުށައެޅުންތަަކަށް ގާޒީ އިސްމާއިލް ޝަފީއު ވަނީ ގޮތް ނިންމަވާފައެވެ.

ގާޒީ ޝަފީއު ވަނީ ދިފާއުގެ ހުށައެޅުން ބަލައިނުގެންނެވުމަށް ނިންމަވާފައެވެ.

އަދި ދައުލަތުން ހުށައަޅާފައިވާ ހުށައެޅުން ބަލައިގެންނެވުމަށް ގާޒީ ވަނީ ނިންމަވާފައެވެ. އެގޮތުން މި މައްސަލައިގެ ބާވަތަށް ބަލާއިރު، ހެކިވެރިޔާއަށް ރައްކާތެރިކަން ލިބިދޭންޖެހޭކަމަށް ގާޒީ ޝަފީއު ވިދާޅުވިއެވެ.

ދެން އޮންނާނީ މި މައްސަލައިގެ ހެކިބަސް ނެގުމެވެ.