72 ކިލޯ މަސްތުވާތަކެތި ދިވެހިރާއްޖެއަށް އެތެރެކޮށް އެތަކެތި ޓްރެފިކްކުރަން އުޅުނު މައްސަލައިގައި އެންމެ އިސްކޮށް ހުރި ކަމަށް ތުހުމަތު ކުރާ އިރުފާން ތަގިއްޔު ޝަރީއަތް ނިމެންދެން ބަންދުކޮށްފައި ހުއްޓައި އޭނާ ބަންދުން ދޫކޮށްލި މައްސަލަ ހައިކޯޓުގައި އިސްތިއުނާފު ކޮށްފައިވާކަމަށް ދައުލަތުން ބުނެފިއެވެ.
ދައުލަތުން އެހެން ބުނެފައިވަނީ ހޯމަ ދުވަހު މި މައްސަލައިގައި ބޭއްވި އަޑުއެހުމުގައެވެ.
ހޯމަ ދުވަހުހެކިބަސްނެގުމަށް ބޭއްވި އަޑުއެހުމަށްފަހު ދެން ކުރިއަށްދިޔައީ ބަންދު މުރާޖައާ ކުރުމެވެ. އެގޮތުން މި މައްސަލައިގައި ދައުވާލިބޭ އިރުފާން ތަޤިއްޔުއާއި، މުޙައްމަދު އަކްރަމްގެ ބަންދު މުރާޖައާ މީގެ ކުރިން ކޮށްފައިވާތީ މި އަޑުއެހުމުގައި ވަނީ ދައުވާލިބޭ ނަސީރުގެ ބަންދު މުރާޖައާ ބައި ކުރިއަށް ގެންގޮސްފައެވެ.
މި އަޑުއެހުމުގައި ދައުލަތުގެ ވަކީލު ވިދާޅުވީ، މި މައްސަލައިގައި އިރުފާން ތަޤިއްޔު ބަންދުން ދޫކޮށްލުމަށް ދަށު ކޯޓުން ނިންމި ނިންމުން ދައުލަތުން ހައިކޯޓުގައި އިސްތިއުނާފުކޮށްފައިވާކަމަށެވެ.
ދައުލަތުން ވަނީ އަހުމަދު ނަސީރު މިހާރުވެސް ހުރި ގޮތަށް ޝަރީއަތް ނިމެންދެން ބަންދުކޮށްފައި ބެހެއްޓުމަށް އެދިފައެވެ.
ދިފާއުން ވަނީ އޭނާގެ ސިއްޙީ މައްސަލަަތަކެއް ހުރިކަން ފާހަގަކޮށް، އެކަށީގެންވާ ބޭސް ނުލިބޭކަމަށްވެސް ބުނެފައެވެ. ޝަކުވާ ފޯމު ހުށައަޅައިގެންވެސް އެކަށީގެންވާ ގޮތެއްގައި ޙައްލެއް ނުލިބޭކަން ދިފާއުން ފާހަގަ ކުރިއެވެ.
އޭނާ ޝަރުތުތަކާއެކު ބަންދުން ދޫކޮށްލުމަށް ދިފާއުން މި އަޑުއެހުމުގައި އެދިފައިވެއެވެ.
އެކަމާ ގުޅޭގޮތުން ދައުލަތުގެ ވަކީލު ވިދާޅުވީ، ބޭސްފަރުވާއާ ގުޅޭ ކަންކަން މޯލްޑިވްސް ކަރެކްޝަނަލް ސަރވިސްއިން ކުރިއަށް ގެންދެވޭނެ ކަމަށާއި، އޭނާ ބަންދުކުރި ސަބަބުތަކަށް ބަދަލެއް އައިސްފައިނުވާކަމަށެވެ.
ދެފަރާތުން ދެއްކެވި ވާހަކަތަކަށް ރިއާޔަތް ކުރައްވައި މައްސަލަ ބައްލަވާ ގާޒީ އިބްރާހިމް އިޙްސާން ވިދާޅުވީ، ބޭސްފަރުވާގެ ޒިންމާއަކީ ހަމައެކަނި ކަރެކްޝަންސްގެ ޒިންމާއެއް ނޫން ކަމަށާއި، ދައުވާލިބޭ ފަރާތަށް އެކަށީގެންވާ ބޭސްފަރުވާ ނުލިބޭކަމަށް ބުނާއިރު، އެކަން ކަށަވަރު ކުރުމަކީ ދައުލަތުން ކުރަންޖެހޭނެ ކަމެއްކަމަށެވެ. އޭނާއަށް އެކަށީގެންވާ ބޭސްފަރުވާ ލިބޭތޯ ކަށަވަރު ކުރުމަށްވެސް ގާޒީ ވަނީ ދައުލަތަށް ދަންނަވާފައެވެ.
ގާޒީ ވަނީ އޭނާ ޝަރީއަތް ނިމެންދެން ބަންދުކޮށްފައި ހުރި ހުރުން ދަމަހައްޓަވަން ނިންމަވާފައެވެ. އޭނާގެ ބަލި ޙާލަތާއި ގުޅޭ ލިއުންތަކާއެކު ތަފްސީލީ ގޮތެއްގައި ކޯޓަށް ހުށައަޅައިފިނަމަ، އޮންނަ އުސޫލުގެ ތެރެއިން ނިންމެވުން މުރާޖައާ ކުރައްވާނެކަމަށްވެސް ގާޒީ ވިދާޅުވިއެވެ.
