ގާނޫނާ ހިލާފަށް މަޖިލިސް ހިންގުމަށް ވާގިވެރިވާ މުވައްޒަފުންނަށް ވެސް ފިޔަވަޅުއަޅަންޖެހޭ - ޝަރީފް

ގާނޫނާ ހިލާފަށް ރައްޔިތުންގެ މަޖިލިސް ހިންގުމަށް ވާގިވެރިވާ މުވައްޒަފުންނަށް ވެސް ފިޔަވަޅުއަޅަންޖެހޭ ކަމަށް މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައެއް އަނެއްކާވެސް މަޖިލީހަށް ވެއްދުމަށް އެމްޑީޕީގެ ޕާލަމެންޓްރީ ގްރޫޕުން ފާސްކޮށްފައިވާ ދަނޑިވަޅެއްގައި، ޝަރީފް ކުރެއްވި ޓްވީޓެއްގައި ވިދާޅުވީ ގާނޫނާއި ހިލާފަށް ރައްޔިތުންގެ މަޖިލިސް ހިންގުމަށް ވާގިވެރިވާ މުވައްޒަފުންނަށް ވެސް ފިޔަވަޅު އަޅަންޖެހޭނެ ކަމަށެވެ. އަދި މިފަހަރު ގާނޫނާ ހިލާފަށް މަޖިލިސް ހިސޯރު ކުރުމަށް އެހީތެރިވާ ކޮންމެ މީހަކާ މެދު ފިޔަވަޅު އަޅަންޖެހޭ ކަމަށެވެ.

ޝަރީފް ވިދާޅުވީ އެއްވެސް ބޭފުޅަކަށް ގޮށްމުށުގެ ބާރުން މަޖިލީހުގެ ރިޔާސަތު ބަގުޑި ބައްދައިގެން ހުންނެވޭނެ ކަމަށް ހީކުރަައްވައިގެން ނުވާނެ ކަމަށެވެ. މީގެ ކުރިން މަޖިލީހުގެ ރައީސް ނަޝީދު ގާނޫނާ ހިލާފަށް ރިޔާސަތު ހިސޯރުކުރި ގޮތަކަށް މިފަހަރު ކަން ކުރަން އެމްޑީޕީން ފުރުސަތު ނުދެއްވާނެ ކަމަށެވެ.

ޕީޖީ ގްރޫޕުން އާދިއްތަ ދުވަހު ބޭއްވި ބައްދަލުވުމުގައި ނަޝީދުގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހަށް ހުށަހެޅުމަށް ފާސްވީ ހާޒިރުވެވަޑައިގަތް ހުރިހާ މެމްބަރުންގެ އިއްތިފާޤުންނެވެ.

މަޖިލީހުގެ ރައީސްގެ އިތުރުން ނައިބު ރައީސް އީވާ އަބްދުﷲގެ އިތުބާރު ނެތް ކަމުގެ މައްސަލަ މީގެ ކުރިން އެމްޑީޕީން ހުށަހެޅި ނަމަވެސް އެ މައްސަލަ އަނބުރާ ނަގާފައިވަނީ މަސްލަހަތައް ބަލައި ކަމަށް މީގެ ކުރިން އެމްޑީޕީން ވަނީ ބުނެފައެވެ.