މާލޭގައި ތޫނު އެއްޗަކުން މީހަކަށް ހަމަލާ ދިން މައްސަލައިގެ ތުހުމަތުގައި ހައްޔަރުކުރި އަންހެން މީހާގެ ބަންދަށް 15 ދުވަސް ޖަހައިފިއެވެ.
ފުލުހުން ބުނީ ހޮނިހިރު ދުވަހު މާލޭގައި މީހަކަށް ތޫނު އެއްޗަކުން ހަމަލާ ދިން މައްސަލައިގެ ތުހުމަތުގައި ހައްޔަރުކުރި މީހާގެ ބަންދަށް 15 ދުވަސް ކްރިމިނަލް ކޯޓުން ޖަހާފައިވާ ކަމަށެވެ. ބަންދުގެ މުއްދަތު ޖަހާފައިވަނީ އާދިއްތަ ދުވަހު ކޯޓަށް ހާޒިރު ކުރުމުންނެވެ.
މި މައްސަލައާ ގުޅިގެން ހައްޔަރުކޮށްފައިވަނީ އުމުރުން 29 އަހަރުގެ އަންހެނެކެވެ.
އޭނާގެ ވަނަވަރެއް ފުލުހުން ހާމައެއް ނުކުރެއެވެ.
ތޫނު އެއްޗަކުން ހަމަލާދީފައިވާ މީހަކަށް އޭޑީކޭގައި ފަރުވާ ދެމުންދާ ކަމަށް ފުލުހުންނަށް ރިޕޯޓުކޮށްފައިވަނީ ހޮނިހިރު ދުވަހުގެ 11:02ހާއިރުއެވެ.
ސޯޝަލް މީޑިއާގައި އާއްމުވެފައިވާ ވީޑިއޯއިން ފެންނަނީ ފޯނު ވިއްކާ ފިހާރައަކަށް އަންހެނަކު ވަދެ، އެތަނުގެ ފިރިހެން މުވައްޒަފަކާ ވާހަކަދައްކާ މަންޒަރެވެ. ފޯނެއް ދެއްކުމަށް އެދުމުން އެ ފިރިހެން މީހާ ފޯނެއް ނަގައި އެ އަންހެން މީހާއަށް ދައްކައެވެ. އެއަށްފަހު ކޮންމެވެސް ކަމަކާ ހިތްހަމަނުޖެހިގެން އަންހެން މީހާ ޒުވާބުކުރާ މަންޒަރު ފެނެއެވެ. އަދި އަންހެން މީހާ ދާން ހިނގައިގަންނަމުން އެ ފިރިހެން މީހާގެ ކަރުގައި ވަޅި އަޅުވާލުމަށްފަހު އޭނާ ނުކުމެގެން ދެއެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
