ވައްކަމުގެ މައްސަލަތަކުގެ ނިސްބަތް ދަށަށް
އަހަރުގެ މިހާތަނަށް އަންނަ އިރު ވައްކަމުގެ މައްސަލަތަކުގެ އަދަދު އުޅެނީ އެވްރެޖްކޮށް 3000 އިން މަތީގަ
ޝަހީދު ހުސެއިން އާދަމް ބިލްޑިން
ފާއިތުވެ ދިޔަ އަހަރުތަކާއި އަޅައި ބަލާ އިރު ފުލުހުންނަށް ހުށަހަޅާފައިވާ ވައްކަމުގެ މައްސަލަތައް ނިސްބަތުން ދަށް ކަމަށް ފުލުހުންގެ ތަފާސް ހިސާބުތަކުން ދައްކައިފިއެވެ.
ފުލުހުންގެ ތަފާސްހިސާބުތަކުން އެނގޭ ގޮތުން އަހަރުގެ މިހާތަނަށް އަންނަ އިރު ވައްކަމުގެ މައްސަލަތަކުގެ އަދަދު އުޅެނީ އެވްރެޖްކޮށް 3000 އިން މަތީގައެވެ. 2022 ވަނަ އަހަރު މިހާތަނަށް 3104 ވައްކަމުގެ މައްސަލަ ހުށަހަޅާފައިވެއެވެ. އެހެންނަމަވެސް މިއަހަރުގެ މިހާތަނަށް ހުށަހަޅާފައި ވަނީ 2603 މައްސަލައެވެ. މީގެ އިތުރުން 2020 ވަނަ އަހަރު 3578 މައްސަލަ ހުށަހަޅާފައި ވާއިރު 2021 ވަނަ އަހަރު 4677 މައްސަލަ އަދި 2022 ވަނަ އަހަރު 3977 މައްސަލަ ހުށަހަޅާފައިވެއވެެ.
މި އަހަރު ފުލުހުންނަށް ހުށަހަޅާފައިވާ އިތުރު މައްސަލަތަކުގެ ތަފާސްހިސާބުތަކަށް ބަލާއިރު ޓްރެފިކް އެކްސިޑެންޓުގެ 1688 މައްސަލަ ވަނީ ހުށަހަޅާފައެވެ. އަދި މަސްތުވާތަކެއްޗާ ގުޅޭ 1363 މައްސަލަ ، އެއްޗެހި ގެއްލިގެން 1199 މައްސަލަ އަދި މަކަރާއި ހީލަތް ހެދުމުގެ 588 މައްސަލަ ވަނީ ހުށަހަޅާފައެވެ. ހަމައެހެންމެ ޖިންސީ ގޯނާގެ 216 މައްސަލަ އާއި ގެވެށި އަނިޔާގެ 161 މައްސަލަ ، ފޯޖް ކުރުމުގެ 95 މައްސަލަ އަދި ޗެކް ބައުންސްވުމުގެ 8 މައްސަލަ ވެސް ވަނީ ހުށަހަޅާފައެވެ. އަދި އަނިޔާކުރުމުގެ 472 މައްސަލަ އާއި މުދަލަށް ގެއްލުންދިނުމުގެ 437 މައްސަލަ ހުށަހަޅާފައިވާ އިރު ފޭރުމުގެ 261 މައްސަލަ ވަނީ ހުށަހަޅާފައެވެ.
