މާލޭގައި ތޫނު އެއްޗަކުން މީހަކަށް ހަމަލާ ދިން މައްސަލައެއް ތަހުގީގު ކުރަން ފަށައިފި
ޒަހަމްވި މީހާއަށް އޭޑީކޭގައި ދަނީ ފަރުވާ ދެމުން
މީގެ ކުރިން މާލޭގައި ހިނގި ހާދިސާއަކާ ގުޅިގެން ކްރައިމް ސީން ފުލުހުން ބަންދުކޮށްފައި
މާލޭގައި ތޫނު އެއްޗަކުން މީހަކަށް ހަމަލާ ދިން މައްސަލައެއް ފުލުހުން ތަހުގީގު ކުރަން ފަށައިފިއެވެ.
ފުލުހުން ބުނީ ތޫނު އެއްޗަކުން ހަމަލާދީފައިވާ މީހަކަށް އޭޑީކޭގައި ފަރުވާ ދެމުންދާ ކަމަށް ހޮނިހިރު ދުވަހުގެ 11:02 ހާއިރު ރިޕޯޓުކޮށްފައިވާ ކަމަށެވެ. އަދި މި މައްސަލައާ ގުޅިގެން 29 އަހަރުގެ އަންހެނަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.
ފުލުހުން ބުނީ މިމައްސަލަ އިތުރަށް ތަހުގީގު ކުރަމުންދާ ކަމަށެވެ.
ސޯޝަލް މީޑިއާގައި އާއްމުވެފައިވާ ވީޑިއޯއިން ފެންނަނީ ފޯނު ވިއްކާ ފިހާރައަކަށް އަންހެނަކު ވަދެ، އެތަނުގެ ފިރިހެން މުވައްޒަފަކާ ވާހަކަ ދައްކާ މަންޒަރެވެ. ފޯނެއް ދެއްކުމަށް އެދުމުން އެ ފިރިހެން މީހާ ފޯނެއް ނަގާ އެ އަންހެން މީހާއަށް ދައްކައެވެ. އެއަށްފަހު ކޮންމެވެސް ކަމަކާ ހިތްހަމަނުޖެހިގެން އަންހެން މީހާ ޒުވާބުކުރާ މަންޒަރު ފެނެއެވެ. އަދި އަންހެން މީހާ ދާން ހިނގައިގަންނަމުން އެ ފިރިހެން މީހާގެ ކަރުގައި ވަޅި އަޅުވާލުމަށްފަހު އޭނާ ނުކުމެގެން ދެއެވެ.
