ޑިކޯވެގެން ފަރުވާދެމުންދިޔަ މީހަކު އިތުރު ފަރުވާއަށް ޝަންގްރި-ލާ ރިސޯޓަށް ގެންގޮސްފި
21 ޖުލައި 2017 | ހުކުރު 10:36އޭނާ ގެންގޮސްފައިވަނީ އެމްއެންޑީއެފްގެ ހެލިކޮޕްޓަރުގައި
އެމްއެންޑީީއެފްގެ ހެލިކޮޕްޓަރުގައި މީހަކު ޓްރާންސްފަރ ކުރުމުގެ ތެރެއިން | އެމްއެންޑީއެފް
ފުޅިއަޅައިގެން އެންދަމަން ފީނަން އުޅުނު މީހަކު، ޑައިވިންގ ޑީކޮމްޕްރެޝަން ސިކްނެސް (ޑީކޯ) ވެގެން އެމްއެންޑީއެފް ކުރަނގި ހެލިކޮޕްޓްރުގައި ޝަންގްރި-ލާ ވިލިނގިލި ރިސޯޓަށް ގެންގޮސްދީފިއެވެ.
އެމްއެންޑީއެފުން ބުނީ، ޑރ. ޢަބްދުއްޞަމަދު މެމޯރިއަލް ހޮސްޕިޓަލުގައި ފަރުވާދެމުންދިޔަ 52 އަހަރުގެ ދިވެއްސަކު މިއަދު ހެނދުނު 10:45 ހާއިރު ޝަންގްރި-ލާ ވިލިނގިލި ރިސޯޓަށް އެމްއެންޑީއެފް ކުރަނގި ހެލިކޮޕްޓްރުގައި ގެންގޮސްދީފައިވަނީ، އޭނާއަށް ހާއްސަ ޞިއްހީ އިތުރު އަވަސް ފަރުވާ ދޭން ޖެހުމާއި ގުޅިގެން ޑރ. ޢަބްދުއްޞަމަދު މެމޯރިއަލް ހޮސްޕިޓަލުން އެމްއެންޑީއެފްގައި އެދުމުން ކަމަށެވެ.
އެމްއެންޑީއެފުން ބުނީ، ޑީކޯވެގެން ފަރުވާދެމުންދާ މީހާ ބުރާސްފަތި ދުވަހުގެރޭ ފަތިހު ދެ ފަހަރެއްގެމަތިން، 40 މީޓަރަށް ފީނާފައިވާ ކަމަށް މަޢުލޫމާތު ލިބިފައިވާ ކަމަށެވެ.
މި މީހާ ޝަންގްރި-ލާ ވިލިނގިލި ރިސޯޓަށް ގެންގޮސްދިނުމުގައި އެމްއެންޑީއެފް ސަދަން އޭރިއާގެ ސިފައިންނާއި ސީ އެމްބިއުލެންސް ވަނީ ހަރަކާތްތެރިވެފައެވެ.
