އުުމުރުން ދުވަސްވީ މީހުން ބެލުމަށް ސަރުކާރާއި ހަވާލުކުރުން ވެގެންދަނީ އެ ފަރާތްތަކަށް ލިބޭ ވަރަށް ބޮޑު އެކަނިވެރިކަމެއްގެ ގޮތުގައި: އޭޖް ކެއަރ މޯލްޑިވްސް

އުުމުރުން ދުވަސްވީ މީހުން ބެލުމަށް ސަރުކާރާއި ހަވާލުކުރުން ވެގެންދަނީ އެ ފަރާތްތަކަށް ލިބޭ ވަރަށް ބޮޑު އެކަނިވެރިކަމެއްގެ ގޮތުގައިކަމަށް އޭޖް ކެއަރ މޯލްޑިވްސް އިން ވަނީ ފާހަގަކޮށްފައެވެ.

ރާއްޖެ ޓީވީގެ ފަސްކާފު ޕްރޮގްރާމްގައި ވާހަކަފުޅު ދައްކަވަމުން އޭޖް ކެއަރ ގެ ޑިރެކްޓަރ ރަޒީނާ ތުއްތު ވިދާޅުވީ، އުމުރުން ދުވަސްވީ މީހުންނަށް ދިމާވާ މައިގަނޑު މައްސަލަތަކަކީ، އެމީހުންނަށް ހެލިފެލިވެ، ބޭރަށް ނިކުމެ އުޅެވޭނެކަހަލަ މާހައުލެއް ގާއިމްވެފަ ނެތުމާއި، ބީދޭސީންގެ އަތްމަށްޗަށް އެމީހުންގެ ކަންކަން ދޫކޮށްލައިގެން ތިބުންކަމަށެވެ.

Advertisement

އޭޖް ކެއަރ ގެ ފައުންޑަރ މެމްބަރ އަދި ސީއީއޯ ޑރ. އާމިނަތު ޖަމީލް ވިދާޅުވީ، ދުވަސްވީ މީހުންނާއިއެކު އާއިލާއިން ވަގުތު ހޭދަނުކުރުމުން އެމީހުންނަށް އެކަނިވެރިކަމާއި، މާޔޫސްކަމާއި ކުރިމަތިލާންޖެހޭކަމަށެވެ.

މީގެއިތުރުން އާމިނަތު ޖަމީލް ވިދާޅުވީ، އުުރުން ދުވަސްވީ މީހުން ބެލުމަށް ސަރުކާރާއި ހަވާލުކުރުން ވެގެންދަނީ އެ ފަރާތްތަކަށް ލިބޭ ވަރަށް ބޮޑު އެކަނިވެރިކަމެއްކަމަށެވެ. އެގޮތުން، އެފަދަ މަރުކަޒުތަކަށް ފޮނުވާލުމަށްފަހު އާއިލާތަކާއި އޮންނަ ގުޅުން އެއްކޮށް ކެނޑިގެންދާކަމަށްވެސް އޭނާ ފާހަގަކުރެއްވިއެވެ. އުމުރުން ދުވަސްވީ މީހުން ނުބެލި، ސަރުކާރާއި ހަވާލުކުރި ކަމުގައިވީނަމަވެސް އެ ފަރާތްތަކާއި ގުޅުން ބޭއްވުމަށް އާމިނަތު ޖަމީލްވަނީ އެދިލައްވާފައެވެ.

އާމިނަތު ޖަމީލް އިތުރަށް ވިދާޅުވީ، އެ ސޮސައިޓީގެ ފަރާތުން އެ މީހުންނާއި ބައްދަލުކުރުމުން އަންނަ އެންމެ ބޮޑު އެއް ޝަކުވާއަކީ އާއިލާގެ ފަރާތުން ނުގުޅާކަމާއި، އެއްވެސް ގުޅުމެއް ނުބަހައްޓާކަމުގެ ޝަކުވާތައްކަމަށެވެ. އަދި މިކަންކަމަކީ ވަރަށް ކަންބޮޑުވާ ކަންކަމުގެ ގޮތުގައި އާމިނަތު ޖަމީލް ވަނީ ފާހަގަކުރައްވާފައެވެ.

އޭޖް ކެއަރ މޯލްޑިވްސް އަކީ ސިއްހަތު ރަނގަޅަށް ހަރަކާތްތެރިވެތިބެ ދުވަސްވުމަށް ދިއުމަށް އެހީތެރިވެ ދިނުމަށް އުފައްދާފައިވާ ޖަމިއްޔާއެކެވެ. އަދި މި ޖަމިއްޔާގެ ފަރާތުން އުމުރުން ދުވަސްވީ މީހުންނަށް ކަސްރަތް ޕްރޮގްރާމްތަކާއި، އެ އުމުރުގެ މީހުން އެއްވެ މައުލޫމާތު ދިނުމުގެ ސެޝަން ފަދަ ކަންކަން ކުރިއަށް ގެންދެއެެވެ.