ރާއްޖޭގައި ނަފްސާނީ ދުޅަހެޔޮކަމުގެ އުނދަގޫތައް ހުރެގެން ފަރުވާހޯދާ މީހުން ގިނަ: ޑރ.ޝަނޫހާ
ކޮންމެ 5 މީހުންގެ ތެރެއިން އެކަކީ ނަފްސާނީ އުދަނގުލާއެކު ދިރިއުޅޭ މީހުން
ކޮންސަލްޓަންޓް ސައިކިއޭޓްރިސްޓް ޑރ.ޝަނޫހާ މަންސޫރު
ރާއްޖޭގައި ނަފްސާނީ ދުޅަހެޔޮކަމުގެ އުނދަގޫތައް ހުރެގެން ފަރުވާހޯދާ މީހުންގެ އަދަދު ގިނަ ކަމަށް ކޮންސަލްޓަންޓް ސައިކިއޭޓްރިސްޓް ޑރ.ޝަނޫހާ މަންސޫރު ވިދާޅުވެއްޖެއެވެ.
އޮއެވަރު ކޮންފަރެންސްއާ ގުޅޭގޮތުން ދެއްވި ޚާއްސަ އިންޓަވިޔުގައި ޑރ.ޝަނޫހާ ވިދާޅުވީ ދިރިއުޅެމުން ދަނީ ބަދަލުވަމުންދާ ދުނިޔެއެއްގައި ކަމަށާއި، ފާއިތުވެދިޔަ އަހަރުތަކުގައި ނަފްސާނީ ބައްޔާ މެދު ދުނިޔެ ދެކޭ ގޮތަށް ބަދަލުތަކެއް އައިސްފައިވާ ކަމަށެވެ.
ނަފްސާނީ ދުޅަހެޔޮކަމަށް މަސައްކަތް ކުރަންޖެހޭކަން ފާހަގަކުރައްވައި ޑރ.ޝަނޫހާ ވިދާޅުވީ މި އުދަނގޫތަކުގައި ވަރަށް ގިނަ މީހުން އުޅޭކަމަށެވެ. އެގޮތުން ކޮންމެ 5 މީހުންގެ ތެރެއިން އެކަކީ ނަފްސާނީ އުދަނގުލާއެކު ދިރިއުޅޭ މީހުން ކަމަށް އޭނާ ވިދާޅުވިއެވެ. މީގެ ތެރެއިން 50 އިންސައްތަ މީހުންނަށް މި މައްސަލަ ކުރިމަތިވަނީ އުމުރުން އެންމެ 14 އަހަރުވުމުގެ ކުރިން ކަމަށް ޑރ.ޝަނޫހާ ވިދާޅުވިއެވެ.
ރާއްޖޭގެ ހާލަތާއި ގުޅޭގޮތުން ޑރ.ޝަނޫހާ ވިދާޅުވީ ނަފްސާނީ ދުޅަހެޔޮކަމުގެ އުނދަގޫތައް ހުރެގެން ފަރުވާހޯދާ ފަރާތްތަކުގެ އަދަދު ވަރަށް ގިނަ ކަމަށެވެ. ނަމަވެސް ރަނގަޅު ފެންވަރުގައި ނަފްސާނީ ފަރުވާ ލިބުމުގައި ދަތިތަކެއް އެބަހުރި ކަމަށް ޑރ.ޝަނޫހާ ވިދާޅުވިއެވެ.
ގޮންޖެހުންތަކާއެކު ވެސް ނަފްސާނީ ބަލިތަކަށް އާއްމު ރައްޔިތުން ހޭލުންތެރި ކުރުވުމަށާއި، ފަރުވާ ދިނުމަށް އައިޖީއެމްއެޗުން ދަނީ މަސައްކަތް ކުރަމުންނެވެ.
އައިޖީއެމްއެޗްގައި ނޭޝަނަލް ސެންޓަރ ފޮރ މެންޓަލް ހެލްތު ހުޅުވީ 25 މާރޗް 2019ގައެވެ. މި ސެންޓަރަކީ ޓަރޝަރީ ފެންވަރުގައި ވަށާޖެހޭ ޚިދުމަތްތައް ފޯރުކޮށްދެވޭ، ނަފްސާނީ ބަލިތަކުގެ ފަރުވާއަށް ޚާއްސަ ކުރެވިގެން ރާއްޖޭގައި ހުޅުވުނު ހަމައެކަނި ސެންޓަރެވެ. މަދު އަދަދެއްގެ ސިއްހީ މާހިރުންނާއެކު ފެށި އެ ސެންޓަރުން ފުރަތަމަ އަހަރު އެކަނިވެސް މުޅި ޖުމްލަ 7246 ކޮންސަލްޓޭޝަން ކުރިއަށް ގެންދިޔަކަމަށް އައިޖީއެމްއެޗުން ބުނެއެވެ.
މީގެ އިތުރުން ސަރުކާރުގެ ވުޒާރާތަކާއި އަމިއްލަ ޖަމިއްޔާތައް, އަދި ކަމާބެހޭ އދ.ގެ ޖަމިއްޔާތަކާ ގުޅިގެން ގައުމީ ފެންވަރުގައި ނަފްސާނީ ދުޅަހެޔޮކަން ކަށަވަރުކުރުމަށް ދަނީ ގިނަގުނަ މަސައްކަތްތަކެއް ކުރެވެމުންނެވެ.
