ކޮމިއުނިކޭޝަންސް އޮތޯރިޓީ އޮފް މޯލްޑިވްސް އިން ވައްކަން ކުރި މީހަކު ގޭބަންދަށް
އަވަސްނިޔާގެ ޝަރީއަތެއް ކުރިއަށް ގެންދިޔަ
ކްރިމިނަލް ކޯޓު
ކޮމިއުނިކޭޝަންސް އޮތޯރިޓީ އޮފް މޯލްޑިވްސް އިން ވައްކަން ކުރި މީހަކު ގޭބަންދު ކުރުމަށް ހުކުމް ކޮށްފިއެވެ.
މި މައްސަލައިގައި ދައުވާކޮށްފައިވަނީ ސ. ފޭދޫ ކޯޒީކޯނަރ އަލީ ސައީދުގެ މައްޗަށެވެ. ދައުލަތުން މި ދައުވާ ކޮށްފައިވަނީ 19 ޖުލައި 2023 ވަނަ ދުވަހުގެ ދަންވަރު ކޮމިއުނިކޭޝަންސް އޮތޯރިޓީ އޮފް މޯލްޑިވްސްގެ ގަރާޖަށް ވަދެ އެތަނުގައި ބަހައްޓާފައި ހުރި ކޭބަލް ރޯލުތަކުން 5 މީޓަރުގެ ދިގު ކޭބަލެއް ބުރިކޮށް އެ ކޭބަލް ވަގަށް ނަގައިގެން ގެންދަން އުޅެފައިވާތީއެވެ.
އަލީ ސައީދުގެ މައްޗަށް ދައުވާކޮށްފައިވަނީ ދިވެހިރާއްޖޭގެ ގާނޫނުލްއުގޫބާތުގެ 211 ވަނަ މާއްދާގެ (ހ) އާއި 210 ވަނަ މާއްދާގެ (ށ) ގެ 4 ވަނަ ނަންބަރާއި ހަވާލާދީ، 80 ވަނަ މާއްދާގެ (ހ) އަށް ރިއާޔަތްކޮށް، 86 ވަނަ މާއްދާގެ (ހ) ގެ ދަށުންނެވެ.
މި މައްސަލަ ކުރިއަށް ގެންގޮސްފައިވަނީ އަވަސްނިޔާގެ އަޑުއެހުމުގެ ގޮތުގައެވެ. އަލީ ސައީދު ވަނީ އިބްތިދާއީ އަޑުއެހުމުގައި ދައުވާއަށް އިއުތިރާފުވެފައެވެ. އަދި އަވަސް ނިޔާގެ އަޑުއެހުމުގައި ވެސް އޭނާ ވަނީ އިބްތިދާއީ އަޑުއެހުމުގައި ވެފައިވާ އިއުތިރާފު ދަމަހައްޓާފައެވެ.
ވައްކަން ކުރި މައްސަލައިގައި، ދިވެހިރާއްޖޭގެ ގާނޫނުލްއުގޫބާތުގައި ބަޔާންކުރާ އަދަބު މަތިކުރާ ހާލަތްތަކާއި އަދަބު ދަށްކުރާ ހާލަތްތަކަށް ރިއާޔަތްކޮށް، މި މައްސަލައިގައި އަލީ ސައީދުގެ މައްޗަށް ކަނޑައެޅޭނެ އަދަބަކީ 13 ދުވަހުގެ ޖަލުހުކުމެކެވެ.
އަލީ ސައީދުގެ މައްޗަށް ޖޫރިމަނާގެ އަދަބެއް ކަނޑައަޅައިފިނަމަ ޖޫރިމަނާގެ ފައިސާ ދެއްކޭނެކަމަށް ބުނެފައިވެއެވެ. އަދި މި މައްސަލައިގައި ޖޫރިމަނާގެ އަދަބު ކަނޑައެޅުމަށް އިއުތިރާޒު ނުކުރާ ކަމަށް ދައުލަތުން ބުނެފައިވެއެވެ.
މި މައްސަލައިގެ ހުކުމުގައި ބުނެފައިވަނީ ދިވެހިރާއްޖޭގެ ގާނޫނުލް އުގޫބާތުގެ 211 ވަނަ މާއްދާގެ (ހ) އާއި ހަވާލާދީ އެ ގާނޫނުގެ 80 ވަނަ މާއްދާގެ (ހ) ގެ ދަށުން އަލީ ސައީދު ވައްކަން ކުަން އުޅުމުގެ ކުށުން ކުށްވެރިވެފައިވާ ކަމަށެވެ.
އަދި މި ކުށުގެ އުގޫބާތެއްގެ ގޮތުހން 1 މަހާއި 24 ދުވަހުގެ މުއްދަތަކަށް ޖަލަށްލުމަށް ކަނޑައަޅައި، ދިވެހިރާއްޖޭގެ ގާނޫނުލް އުގޫބާތުގެ 1006 ވަނަ މާއްދާގެ (ށ) ގެ 3 ވަނަ ނަންބަރަށް ރިއާޔަތްކޮށް އަލީ ސައީދު ތަންފީޒުކުރަންޖެހޭ ޖަލު އަދަބުގެ މުއްދަތަކީ 13 ދުވަސް ކަމުގައި ކަނޑައަޅައި، މި ގާނޫނުގެ ދަށުން އޭނާގެ ޖަލު އަދަބު 26 ދުވަހުގެ މުއްދަތަކަށް ގޭގައި ބަންދުކުރުމުގެ އަދަބަށް ބަދަލުކުރުމަށް ވަނީ ކަނޑައަޅައި ހުކުމްކޮށްފައެވެ.
