ފަރެސްމާތޮޑާ ދާއިރާގެ ބައި–އިލެކްޝަން މިއަހަރު ނުބާއްވާނެ
މަޖިލިސް އިންތިޚާބަށް ގާތްގަނޑަކަށް ދެން އޮތީ ހަ މަސް ދުވަސް
ރިޔާސީ އިންތިޚާބުގެ ދާއިމީ ނަތީޖާ އިއުލާންކުރުމަށް ބޭއްވި ނޫސްވެރިންގެ ބައްދަލުވުން
އިންތިޚާބީ ނައިބުރައީސް ހުސައިން މުހައްމަދު ލަތީފު، ނޮވެމްބަރު މަހު މަގާމުގެ ހުވާ ކުރެއްވިނަމަވެސް، ފަރެސްމާތޮޑާ ދާއިރާގެ ބައި–އިލެކްޝަން މިއަހަރު ނުބާއްވާނެ ކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަންގެ ނައިބުރައީސް އިސްމާއީލް ހަބީބު ވިދާޅުވީ، މަޖިލިސް އިންތިޚާބަށް ގާތްގަޑަކަށް ދެން އޮތީ ހަ މަސް ދުވަސް ކަމަށެވެ. އަދި އަންނަ އަހަރުގެ އޭޕްރިލް މަހުގެ ތެރޭގައި މަޖިލިސް އިންތިޚާބު ބާއްވާއިރު، މިއަހަރު ދެން އެއްވެސް ދާއިރާއެއްގެ ބައި–އިލެކްޝަންސް ކޮމިޝަނުން ނުބާއްވާނެ ކަމަށެވެ.
ހަބީބު މިފަދައިން ވިދާޅުވެފައިވާއިރު، ރައްޔިތުންގެ މަޖިލީހުގެ އިންތިޚާބަށް ގިނަ އަދަދެއްގެ މުވައްޒަފުން ހޯދުމަށް އިލެކްޝަންސް ކޮމިޝަނުން ވަނީ އިއުލާންކޮށްފައެވެ.
ކޮމިޝަނުން ވަނީ 300އަށްވުރެ ގިނަ މުވައްޒަފުން ހޯދުމަށް އިއުލާންކޮށްފައެވެ. ކޮމިޝަނުން މުވައްޒަފުން ހޯދަމުންދާ ދާއިރާތަކުގެ ތެރޭގައި އެންމެ ގިނައީ އޮފިސަރުންނެވެ. އެގޮތުން އޮފިސަރުންގެ މަގާމަށް 218 މުވައްޒަފުން ހޯދަން ވަނީ އިއުލާން ކޮށްފައެވެ. އަދި އެސިސްޓަންޓް އޮފިސަރުންގެ މަގާމަށް 40 މުވައްޒަފުން، އަދި ސެކިއުރިޓީ އޮފިސަރުގެ މަގާމަށް 6 މުވައްޒަފުން ހޯދަން ވަނީ އިއުލާންކޮށްފައެވެ. އިތުރު ބައެއް މަގާމުތަކަށް ކުރިމަތިލުމަށް އެދި ހުށަހެޅުމުގެ ފުރުސަތު އިލެކްޝަނުން ވަނީ ހުޅުވާލާފައެވެ.
މުވައްޒަފުން ހޯދަމުންދާ މަގާމާބެހޭ ތަފްސީލްތައް އިލެކްޝަނުންވަނީ ގެޒެޓުގައި ހާމަކޮށްފައެވެ. އެ މަގާމުތަކަށް ކުރިމަތިލުމުގެ ފުރުސަތު އަންނަ ޑިސެމްބަރު 31 ވަނަ ދުވަހުގެ ނިޔަލަށް އޮންނާނެއެވެ. އެހެންނަމަވެސް އިންތިޚާބު އޮންނާނެ ދުވަހެއް އިއުލާންކޮށްފައެއް ނުވެއެވެ.
2024 ވަނަ އަހަރުގެ މަޖިލިސް އިންތިޚާބުގައި 93 ދާއިރާއަކަށް މެންބަރުން އިންތިޚާބު ކުރުމަށް ވަނީ ހަމަޖެހިފައެވެ. ކުރިއަށް އޮތް މަޖިލީހުގެ ދައުރުގައި، ބައެއް ދާއިރާތަކަށް ކިޔާ ނަމާއި ދާއިރާތަކަށް ބައެއް ބަދަލުތައް ވަނީ ގެނެސްފައެވެ.
