ވުމެންސް ފުޓްސަލް ޗެލެންޖް: އެމްޕީއެލް ބަލިކޮށް ސިފައިން ޗެމްޕިއަންކަން ހޯދައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ބޭއްވި މައިލޯ ވިމެންސް ފުޓްސަލް ޗެލެންޖްގައި މޯލްޑިވްސް ޕޯޓްސް ލިމިޓެޑް (އެމްޕީއެލް) ބަލިކޮށް ދިވެހި ސިފައިންގެ ކްލަބް (ޑީއެސްސީ) ޗެމްޕިއަންކަން ހޯދައިފި އެވެ.

ބުރާސްފަތި ދުވަހުގެ ރޭ ކުޅުނު ފައިނަލް މެޗު އެމްޕީއެލްއާ ވާދަކޮށް ސިފައިން މެޗު ކާމިޔާބުކުރީ ޕެނަލްޓީ ޖަހައިގެން 4-5 ގެ ނަތީޖާއިންނެވެ.

މެޗުގައި ސިފައިންނަށް ޕެނަލްޓީ ކާމިޔާބުކޮށްދިނީ އާމިނަތު އަޒީމާ، މަރިޔަމް ރިފާ، ފާތިމަތު އަޝަހުމާ އަދި އާމިނަތު ޒާހިޔާ އެވެ. އޭގެ ތެރެއިން ޒާހިޔާ ވަނީ ދެ ޕެނަލްޓީ ކާމިޔާބުކޮށްފައެވެ.

މެޗުގައި އެމްޕީއެލްގެ ޕެނަލްޓީތައް ކާމިޔާބުކޮށްދިނީ ފާތިމަތު ޝާލިއާ، ފަރާ އަހުމަދު، އާމިނަތު ޝާމިލާ އަދި ފާތިމަތު ނިއުޝާ އެވެ. މެޗުގެ މޮޅު ކުޅުންތެރިޔަކަށް ހޮވުނީ ސިފައިންގެ އާމިނަތު ޒާހިޔާ އެވެ.

މުބާރާތުގެ އެންމެ މޮޅު ފަސް ކުޅުންތެރިންނަށް ހޮވިފައިވަނީ ސިފައިންގެ މަރިޔަމް ރިފާ، ސާއިގާ ހުސެއިން، އެމްޕީއެލްގެ ފާތިމަތު ޝާލިއާ، އާމިނަތު ޝާމިލާ އަދި އަވަ އެފްޓީގެ އަދުވާ ޒާހިރު އެވެ.

މުބާރާތުގެ އެންމެ މޮޅު ކުޅުންތެރިޔަކަށް ސިފައިންގެ މަރިޔަމް ރިފާ ހޮވުނުއިރު، އެންމެ އުންމީދީ ކުޅުންތެރިޔަކަށް ހޮވުނީ އެމްޕީއެލްގެ ޝަފިއްޔާ ރަފާ އެވެ. އެންމެ ގިނަ ލަނޑު ޖެހި ކުޅުންތެރިޔަކަށް ހޮވުނީ ސިފައިންގެ މަރިޔަމް ރިފާ އެވެ.