ހޮނިހިރު ދުވަހު ބޭއްވި ރިޔާސީ އިންތިޚާބުގައި 7000 އަށްވުރެ ގިނަ މީހުން ބާތިލު ވޯޓުލާފައިވާ ކަމަށް ވަގުތީ ނަތީޖާއިން ދައްކައިފިއެވެ.
ވަގުތީ ނަތީޖާއިން ދައްކާ ގޮތުގައި 245,466 މީހުން އިންތިޚާބުގައި ވޯޓުލާފައިވާއިރު އޭގެ ތެރެއިން 7،728 ވޯޓަކީ ބާތިލު ވޯޓެވެ. ރިޔާސީ އިންތިޚާބުގެ ފުރަތަމަ ބުރުގައި ބާތިލު ވޯޓުގެ ގޮތުގައި ލާފައިވަނީ 4،835 ވޯޓެވެ. އެހެންކަމުން ދެވަނަ ބުރުގައި މިއަދަދު މިވަނީ 2،893 ވޯޓު އިތުރުވެފައެވެ.
އިލެކްޝަންސް ކޮމިޝަނުގެ ނާއިބު ރައީސް އިސްމާޢީލް ޙަބީބު އާދީއްތަ ދުވަހު ކުރެއްވި ޓްވީޓެއްގައި ވިދާޅުވީ ދެވަނަ ބުރުގައި ބާތިލް ވޯޓު ގިނަވުމަކީ، އެ ކޮމިޝަނުގެ ވަރަށް ބޮޑު ކަންބޮޑުވުމެއް ކަމަށެވެ. އަދި އެކަންކަން ބަލައި، އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބަށް، ކޮމިޝަނުން އެކަމުގެ ހައްލު ހޯދާނެ ކަމަށް އޭނާ ވިދާޅުވިއެވެ.
ރިޔާސީ އިންތިޚާބުގެ ދެވަނަ ބުރުގައި ބާތިލުވޯޓުތައް އިތުރުވެފައިވާއިރު ސޯޝަލް މީޑިއާގެ ބައެއް ޕެލްޓްފޯމުތަކުގައި "ޓީމް ބާތިލް" ގެ ނަމުގައި މި އިންތިޚާބުގައި ބާތިލު ވޯޓު ގަސްތުގައި ލުމުގެ ކެމްޕޭނެއް ވެސް ކުރިއަށްދިޔައެވެ.
ބާތިލު ވޯޓުތައް ދެވަނަ ބުރުގައި އިތުރުވި ނަމަވެސް އިންތިޚާބުގެ ފުރަތަމަ ބުރާ އަޅާބަލާއިރު ދެވަނަ ބުރުގައި 21،000 މީހުން އިތުރަށް ވޯޓުލި ކަމަށް ހަބީބު ވިދާޅުވިއެވެ. އެގޮތުން ވޯޓުލި މީހުންގެ އަދަދު 87 އިންސައްތައަށްވުރެ މަތި ކަމަށް އޭނާ ފާހަގަކުރެއްވިއެވެ.
ހަބީބު ވިދާޅުވީ އެއް އިންތިޚާބެއްގެ ތަޖުރިބާގެ އަލީގައި، އަނެއް އިންތިޚާބެއްގައި، ވޯޓުލާ މީހުންނަށް ވީހާވެސް ފަސޭހަވާނޭހެން، ކަންތައްތައް ތަރުތީބުކޮށް އިސްލާހު ކުރުމަށް، ކޮމިޝަނުގެ މުވައްޒަފުން ގިނަ މަސައްކަތްތަކެއް ކުރަމުން ގެންދާ ކަމަށެވެ. ނަމަވެސް، ބަޖެޓްގެ ތާށިކަމާހުރެ، އެންމެ ފުރިހަމައަށް އެންމެ ބާރު ސްޕީޑްގައި ކަންތައްތައް ނުވެހުންނަކަމަށް އޭނާ ވިދާޅުވިއެވެ.
އެންމެ އެކަށީގެންވާ ގާބިލް އޮފިޝަލުން ނުލިބުމަކީ ވެސް ގޮންޖެހުމެއްކަން ފާހަގަކުރައްވައި ހަބީބު ވިދާޅުވީ އީސީގެ ޓީމަކީ ގޮންޖެހުންތަކާއެކުވެސް، ނަޒާޙަތްތެރިކަން އިސްކޮށް، ތެދުވެރިކަމާއި އަމާނާތްތެރިކަމާއެކު ވާޖިބު އަދާކުރުމުގައި އެފަދަ ދެވަނައެއްނެތް ހުނަރުވެރި ގާބިލް ޓީމެއް ކަމަށެވެ.
ރިޔާސީ އިންތިޚާބުގެ ދެވަނަ ބުރުގައި އިލެކްޝަންސް ކޮމިޝަނުން ވޯޓުލުމުގެ ކަންކަން އިންތިޒާމުކުރިގޮތާ މެދު ހިތްހަމަޖެހި، ގިނަ ބައެއްގެ ތައުރީފު ވެސް އީސީއަށް ވަނީ އަމާޒުވެފައެވެ.
މިދިޔަ ހޮނިހިރު ދުވަހު ބޭއްވި ރިޔާސީ އިންތިޚާބުގެ ދެވަނަ ބުރުގެ ވަގުތީ ނަތީޖާއިން ދައްކާ ގޮތުގައި 128,099 ވޯޓާއެކު އިންތިޚާބު ކާމިޔާބު ކުރެއްވީ ޕީއެންސީގެ ކެންޑިޑޭޓް ޑރ. މުޙައްމަދު މުއިއްޒުއެވެ. އެމަނިކުފާނާ ވާދަކުރެއްވި މިހާރުގެ ރައީސް، އަދި އެމްޑީޕީގެ ރިޔާސީ ކެންޑިޑޭޓް އިބްރާހީމް މުޙައްމަދު ޞާލިހަށް ލިބިވަޑައިގެންނެވީ 109,639 ވޯޓެވެ.
