ޝަރީފާއި ނިހާދަށް ހަމަލާދީފި
މެންބަރު ޝަރީފަށް ހަމަލާދީފައިވަނީ މެންހަޓަންގައި އިންނަވަނިކޮށް
މެންބަރު ޝަރީފަށް ދިން ހަމަލާގައި މޫނުފުޅު ޒަޚަމްވެފައި
ފޭދޫ ދާއިރާގެ މެންބަރު މުހައްމަދު ނިހާދާއި، މަރަދޫ ދާއިރާގެ މެންބަރު އިބްރާހީމް ޝަރީފަށް ބަޔަކު ހަމަލާދީފިއެވެ.
ފުލުހުން ބުނީ ފޭދޫ ދާއިރާގެ މަޖިލިސް މެންބަރު ނިހާދު ގައިގައި ޖަހާފައިވާ މައްސަލަ ހޮނިހިރު ދުވަހުގެ 11:45 ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ. އަދި އެކަމާ ގުޅިގެން ފުލުހުން ބަލަންޖެހޭ ކަންކަން ބަލަމުން އަންނަކަމަށެވެ. މައުލޫމާތު ލިބިފައިވާ ގޮތުގައި ނިހާދަށް ހަމަލާ ދީފައިވަނީވެސް ގޭންގު ގްރޫޕަކުންނެވެ. ނަމަވެސް ލިބިފައިވަނީ ކޮން އަނިޔާއެއް ކަމެއް އަދި ސާފެއްނުވެއެވެ.
މީގެ އިތުރުން މަންހަޓަން ހޮޓެލުގައި މަރަދޫ ދާއިރާގެ ބޭފުޅުންތަކެއް މަސައްކަތްކުރައްވަން ތިއްބަވަނިކޮށް ގޭންގު ގްރޫޕެއް ވަދެ މެންބަރު ޝަރީފަށް ހަމަލާދީފައިވާކަމަށް އެމްޑީޕީން ވަނީ ބުނެފައެވެ. އަދި އެ މައްސަލަ ފުލުހުންނަށް ހުށަހަޅާފައިވާ ކަމަށް އެމްޑީޕީން ބުނެއެވެ. މަރަދޫ ދާއިރާގެ މެންބަރަށް ހަމަލާ ދިނުމުގެ ސަބަބުން ވާތްފަރާތު ލޯފުޅުމަތި ދުޅަވެފައިވާއިރު މޫނުފުޅު މަތިން ޒަޚަމްތައް ފެންނަން ހުއްޓެވެ.
