ވޯޓު ކަރުދާހުގައި ކުރެހި ކަމަށް ބުނެ ލ. ފޮނަދޫ ފޮއްޓެއްގެ ވޯޓުލުން މެދުކަނޑާލައިފިއެވެ.

ލ. ފޮނަދޫ ތިން ނަމްބަރު ވޯޓު ފޮށީގެ ވޯޓުލުން މެދުކަނޑާލާފައިވާއިރު, އިލެކްޝަންސް ކޮމިޝަންގެ ނައިބުރައީސް އިސްމާއީލް ހަބީބް ވިދާޅުވީ، ފޮނަދޫގައި ވޯޓު ކަރުދާހުގައި ކުރެހި މައްސަލައެއްގައި ވަގުތީގޮތުން ވޯޓުލުން ހުއްޓާލާފައިވާކަމަށެވެ.

ހަބީބު ވިދާޅުވީ މައްސަލަ ހައްލުކުރުމަށް އެ ކޮމިޝަނުން މަސައްކަތް ކުރަމުން އަންނަ ކަމަށެވެ. އަދި އެ ރަށުގެ ވެރިޔާއަށް އިރުޝާދު ދީފައި އޮތީ އައު ފޮއްޓެއްގައި ވޯޓްލުން ދެން ފެށުމަށް ކަމަށެވެ.

އެ މައްސަލައާއެކު، ހަބީބު ވިދާޅުވީ، ވޯޓު ކަރުދާސް ދޫކުރަން އިން, މަރުކަޒުގެ އެހީތެރިޔާ އެ މަސައްކަތުން ދުރުކޮށްފައިވާ ކަމަށެވެ.

ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖް ވަނީ، މި މައްސަލައާ ގުޅިގެން ހަމަނުޖެހުން އުފެދިފައިވާ މަންޒަރު ފެންނަ ވީޑިއޯއެއް ޓްވިޓާގައި ހިއްސާ ކުރައްވާފައެވެ.

ރިޔާސީ އިންތިޚާބުގެ ދެވަނަ ބުރުގެ ވޯޓުލުން ފެށިފަހުން 11 ޖެހުމާ ހަމައަށް 97،220 މީހުން ވޯޓުލާފައިވާކަމަށް, އީސީގެ ތަފާސްހިސާބުތަކުން ދައްކައެވެ.