ހުރިހާ މަރުކަޒަކަށް ވޯޓު ފޮށި ފޮނުވައި ނިމިއްޖެ - ހަބީބު

ހުރިހާ މަރުކަޒަކަށް ވޯޓު ފޮށި ފޮނުވައި ނިމިފައިވާ ކަމަށް އިލެކްޝަންސް ކޮމިޝަންގެ ނާއިބް ރައީސް އިސްމާއީލް ހަބީބު ވިދާޅުވެއްޖެއެވެ.

ހޮނިހިރު ދުވަހު ބާއްވާ ރިޔާސީ އިންތިޚާބުގެ ދެވަނަ ބުރުގައި މާލެ ސަރަހައްދުގައި 187 ފޮށި ބަހައްޓާނެއެވެ. އަތޮޅުތަކާއި ސިޓީތަކުގައި 319 ވޯޓު ފޮށި ބަހައްޓާއިރު, ޖަލުތަކުގައި 5 ވޯޓު ފޮށި ބަހައްޓައެވެ. ސިނާއީ ސަރަހައްދުތަކުގައި 1 ވޯޓު ފޮށި ބަހައްޓާއިރު ރިސޯޓްތަކުގައި 65 ވޯޓު ފޮށި ބަހައްޓާނެއެވެ. އަދި ރާއްޖެއިން ބޭރުގައި 9 ވޯޓު ފޮށި ބަހައްޓާނެއެވެ.

އިލެކްޝަންސް ކޮމިޝަންގެ ނާއިބްރައީސް ހަބީބު ވިދާޅުވީ މާލޭ ސަރަހައްދުގެ ބާކީހުރި 4 ރިސޯޓަށް އޮފިޝަލުންނާއި، ވޯޓުކަރުދާހާއި ވޯޓުލާ މަރުކަޒުތަކަށް ބޭނުންވާ ސާމާނު ހުކުރު ދުވަހުގެ ހެނދުނު 8:00 ގައި ފުރުވާލާފައިވާ ކަމަށެވެ. އަދި ފުވައްމުލަކު ސިޓީ އާއި އައްޑޫސިޓީ އަށް ވެސް ސާމާނު ފޮނުވާފައިވާ ކަމަށެވެ.

ރިޔާސީ އިންތިޚާބުގެ ފުރަތަމަ ބުރުގައި ފަސްހާހާއި ގާތްކުރާ އަދަދަކަށް އޮފިޝަލުން ހަރަކާތްތެރިވިއެވެ. އަދި ދެވަނަ ބުރުގައި 12 ފޮށި އިތުރުވާތީ އިތުރު 100 އޮފިޝަލުންނާއި، އަދި ވޯޓުލާ މީހުންގެ އަދަދަށް ބަލައި ދެ ސެޓްއަޕަކަށް ބަދަލުކުރި ވޯޓު ފޮއްޓާއެކު 350 އޮފިޝަލުން އިތުރުވެއެވެ.

ރިޔާސީ އިންތިޚާބުގެ ދެވަނަ ބުރުގެ ވޯޓުލުން އޮންނާނި 30 ވަނަ ދުވަހުގެ ހެނދުނު 8:00ން ހަވީރު 5:00 އަށެވެ.

ދެވަނަ ބުރުގައި ވޯޓުލުމުގެ ހައްގު 282،804 މީހުންނަށް ލިބޭނެއެވެ. މީގެ ތެރޭގައި ހިމެނެނީ 144،410 ފިރިހެނުންނާއި 138،394 އަންހެނުންނެވެ.