ކަނޑުގެ ތިމާވެއްޓާއި އިގްތިސާދު ރައްކާތެރިކުރުމަށް، ދެމެހެއްޓެނިވި ގޮތެއްގައި މަސައްކަތް ކުރަންޖެހޭ: ޓްރާންސްޕޯޓު މިނިސްޓްރީ
28 ސެޕްޓެމްބަރު 2023 | ބުރާސްފަތި 13:00ތިމާވެށި ހިމާޔަތްކުރުމަށް ކުރިމަތިވެފައިވާ ގޮންޖެހުންތަކުގެ ތެރޭގައި ޖައްވަށް ބޭރުވާ ގޮތްނޭނގޭ، ތަޣައްޔަރުވާ މާއްދާތައް ހިމެނޭ
މަސްބޯޓުތަކެއް
ކަނޑުގެ ތިމާވެއްޓާއި އިގްތިސާދު އަންނަން އޮތް ޖީލުތަކަށްޓަކައި ރައްކާތެރި ކުރުމަށް، ދެމެހެއްޓެނިވި ގޮތެއްގައި މަސައްކަތް ކުރަންޖެހޭ ކަމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ބުނެފިއެވެ.
ބައިނަލްއަގުވާމީ ކަނޑުދަތުރުފަތުރުގެ ދުވަސް 2023އާ ގުޅިގެން ޓްރާންސްޕޯޓު މިނިސްޓްރީން ބުނީ، ދުނިޔޭގެ އެއްގައުމުން އަނެއް ގައުމަށް ވިޔަފާރި މުދަލާއި ފަސިންޖަރުން އުފުލުމަށާއި، ގައުމުތަކުގެ އިގްތިސާދު ހީނަރުވިޔަނުދީ ވިޔަފާރި މުދާ އެއްގައުމުން އަނެއްގައުމަށް ގެންދިއުމުގައި އެންމެ އިސް އަދި އެންމެ މުހިންމު ދައުރެއް އަދާކުރާ މައިގަނޑު ދަތުރުފަތުރުގެ ނިޒާމަކީ ކަނޑުދަތުރުފަތުރުގެ ނިޒާމު ކަމަށެވެ.
ޓްރާންސްޕޯޓު މިނިސްޓްރީން ބުނީ ދެމެހެއްޓެނިވި ގޮތެއްގައި ކަނޑުދަތުރުފަތުރުގެ ނިޒާމު ބައްޓަންކޮށް، ދެމެހެއްޓެނިވި ނިޒާމަކަށް މި ނިޒާމު ހެދުމަށާއި، ކަނޑުގެ ތިމާވެށި ރައްކާތެރިކުރުމުގެ ގޮތުން އިންޓަރނޭޝަނަލް މެރިޓައިމް އޯގަނައިޒޭޝަން (އައި.މއެމްއޯ)އިން ވަނީ ބައިގަރުނު ކުރިން މުއާހަދާއެއް އެކުލަވާލާފައި ވާކަމަށެވެ. މި މުއާހަދާގެ ނަމަކީ ''މާޕޯލް''އެވެ.
މެރިޓައިމް ވީކް 2023 ފާހަގަކުރުމުގެ ގޮތުން އައިއެމްއޯއިން މިއަހަރު ކަނޑައަޅާފައިވާ ޝިއާރަކީ ތިމާވެށީގެ މި ތާރީޚީ މުއާހަދާއަށް 50 އަހަރު ފުރުން ފާހަގަކޮށް، މާޕޯލް މުއާހަދާއަށް ނިސްބަތްކޮށް ''މާޕޯލް އެޓް 50 - އަވަރ ކޮމިޓްމެންޓް ގޯޒް އޮން' އެވެ.
މާޕޯލަކީ ކަނޑު އުޅަނދުފަހަރުން ތިމާވެށި ތަޣައްޔަރުވުން ހުއްޓުވުމުގެ މަގުސަދުގައި ތަންފީޒުކުރެވޭ މުއާހަދާއެވެ. މި މުއާހަދާގެ ސަބަބުން ކަނޑުތައް ހިމާޔަތްކުރުމުގައި ދޭދޭ ގައުމުތަކުގެ މެދުގައި މިކަމަށް އެއްބާރުލުން އިތުރުވެ، ބޮޑެތި ކުރިއެރުންތަކެއް ލިބެމުންދާކަން މިނިސްޓްރީން ފާހަގަކޮށްފައިވެއެވެ. އަދި ކަނޑު އުޅަނދުފަހަރުން ކަނޑަށް ތެޔޮ ލީކުވުން މަދުކުރުމާއި، އުޅަނދުފަހަރުގެ ނަރުދަމާ ބޭރުވުން ކޮންޓްރޯލްކުރުމާއި، ކަނޑުގެ ދިރުންތަކަށް ހިމާޔަތް ހޯދައިދިނުމުގައި މާޕޯލް މުއާހަދާގެ ސަބަބުން ގިނަ ކާމިޔާބީތަކެއް ލިބިފައިވާކަމަށެވެ.
މީގެ އިތުރުން މިނިސްޓްރީން ބުނީ، މޫސުމަށް އަންނަ ބަދަލުތަކުން އަރައިގަތުމަށާއި، އާ ޓެކްނޮލޮޖީއަށާއި، ޑިމާންޑްތަކަށް މި މުއާހަދާއިން އެޑްރެސްކޮށް އުސޫލުތައް އަބަދުވެސް މުރާޖައާ ކުރެވެމުން ދާކަމަށެވެ.
ނަމަވެސް ތިމާވެށި ހިމާޔަތް ކުރުމަށް ކުރިމަތިވެފައިވާ ގޮންޖެހުންތަކުގެ ތެރޭގައި، ޖައްވަށް ބޭރުވާ ގޮތްނޭނގޭ ތަޣައްޔަރުވާ މާއްދާތައް ހިމެނޭ ކަމަށާއި، ދިވެހިރާއްޖެއަށް މުދާ އިމްޕޯޓުކޮށް އެކްސްޕޯޓު ކުރުމަށާއި، އެއްތަނުން އަނެއްތަނަށް މުދާ އުފުލުމުގައި ރާއްޖޭގެ އިގްތިސާދު ބޮޑު އިންސައްތައެއް ބަރޯސާވެފައިވަނީ ރާއްޖޭގެ ކަނޑުތަކަށް ކަމަށް މިނިސްޓްރީން ބުނެއެވެ.
ޓްރާންސްޕޯޓު މިނިސްޓްރީން ބުނީ ރާއްޖޭގެ ޓުއަރިޒަމްގެ މައިގަނޑު އެއް ތަނބަކީ ކަނޑުތަކާއި ފަރުތަކާއި ކަނޑުފަރުގެ ރީތި ދިރުންތައް ކަމަށްވާއިރު، ކަނޑުދަތުރުފަތުރުގެ ދުވަސް ފާހަގަކުރަމުންދާ މި ފުރުސަތުގައި، ކަނޑުގެ ތިމާވެއްޓާއި އިގްތިސާދު އަންނަން އޮތް ޖީލުތަކަށްޓަކައި ރައްކާތެރި ކުރުމަށް ދެމެހެއްޓެނިވި ގޮތެއްގައި މަސައްކަތް ކުރަންޖެހޭ ކަމަށެވެ.
