ފުރަތަމަ ބުރުގައި ވޯޓު ނުދިން މީހުންވެސް ބުނޭ، އިބޫގެ އޯގާތެރިކަމާއި ކޮރަޕްޓްނޫން ވާހަކަ: ފަޒްނާ

ދިމާވާ އެންމެންވެސް ރައީސް އިބްރާހީމް މުޙައްމަދު ސާލިޙުގެ އޯގާތެރިކަމާއި، ކެތްތެރިކަމާއި، ރަނގަޅު ވާހަކަ ދައްކާކަމަށް ފަސްޓްލޭޑީ ފަޒްނާ އަޙުމަދު ވިދާޅުވެއްޖެއެވެ.

ބުރާސްފަތި ދުވަހު ރާއްޖެޓީވީއަށް ދެއްވި ޚާއްސަ އިންޓަރވިއުއެއްގައި ފަޒްނާ ވަނީ ޑޯޓުޑޯ ޙަރަކާތްތަކުގެ ތެރެއިން ފާހަގަ ކުރެވިފައިވާ ބައެއް ކަންކަން ހިއްސާ ކުރައްވާފައެވެ.

Advertisement

ފަޒްނާ ވަނީ ހުޅުމާލޭ ފޭސް 2 ގައި ޑޯޓުޑޯއަށް ވަޑައިގެންނެވި ދުވަހު ހިނގާދިޔަ ކަންކަމަށްވެސް އަލިއަޅުވާލައްވާފައެވެ. އެގޮތުން އެދުވަހު މީސްމީޑިއާގައި ދައުރުވި އިންޓަރވިއުގައި ދައްކާ މީހާއަކީ އެކަމަނާ ފަހަތުން ހަޅޭއްލަވަމުން ދިޔަ މީހާ ނޫންކަން ފާހަގަ ކުރައްވައި ފަޒްނާ ވިދާޅުވީ، އެކަން މުޅިން އޮޅުވާލާފައިވާކަމަށެވެ.

އެއީ ދެރަ ކަމެއްކަމަށްވެސް ފަޒްނާ ވިދާޅުވިއެވެ.

ފަޒްނާ ވިދާޅުވީ، އަނިޔާވެރިކަމަށް ދާން ބޭނުންނުވާކަމަށް ބުނާ ކިތަންމެ ރައްޔިތުންނެއް އެކަމަނާއާ ބައްދަލުވެފައިވާކަމަށެވެ.

އޭގެ އިތުރުން، އިދިކޮޅުގައި ހުންނައިރު ކޮންމެ ވައުދެއްވެސް ވުމަކީ ފަސޭހަކަމަކަށް ވެދާނެ ކަމަށާއި، ނަަމަވެސް އެ ވައުދުތަކުގެ މައްޗަށް ބުރަވެ ވޯޓު ދިނުމުގެ ކުރިން ނުހަނު ވިސްނަންޖެހޭނެ ކަމަށް ފަޒްނާ ވިދާޅުވިއެވެ. އެގޮތުން ވައުދުވެ، ސަރުކާރުން ފުއްދައިދީފައިވާ ވައުދުތަކަށް ބެލުމަށް ފަޒްނާ ވަނީ އެދިވަޑައިގެންފައެވެ.

ފަޒްނާ ވިދާޅުވީ، ބައްދަލުވެވަޑައިގަންނަވާ އެންމެންވެސް އެއްބަސްވާ އެއްކަމެއް އެބައޮތް ކަމަށެވެ. އެގޮތުން އެންމެންވެސް ރައީސް ސާލިޙުގެ ރަނގަޅު ވާހަކަ ފާހަގަކުރާކަމަށް ފަޒްނާ ވިދާޅުވިއެވެ.

ފަޒްނާ ވިދާޅުވީ، ރައީސް ސާލިޙަށް ވޯޓު ދީފައިނުވާ މީހުންވެސް އެކަންކަން ފާހަގަކޮށްފައިވާ ކަމަށެވެ.

ފަޒްނާ ވަނީ ރައީސް ސާލިހަށް ވޯޓު ނުދިން ސަބަބުތައް ބައެއް ފަރާތްތަކުން ކިޔާދީފައިވާކަން ފާހަގަ ކުރައްވައި ބައެެއް ކަންކަން ހިއްސާ ކުރައްވާފައެވެ.

އޭގެ ތެރޭގައި އާއިލާ މެންބަރަކު ޖަލުގައި ހުރުމާއި، ބައެއް ކުންފުނިތަކުގެ މެނޭޖްމަންޓާ ދެމެދުހުރި ހިތްހަމަނުޖެހުންތަކާއި، ގޯތި ލިބުނުއިރު ހުޅުމާލެއިން ގޯތި ލިބިފައިނެތުން ފަދަ ކަންކަން ބައެއް ފަރާތްތަކުން ފާހަގަކޮށްފައިވާކަމަށް ފަޒްނާ ވިދާޅުވިއެވެ.

ފަޒްނާ ވަނީ ވޯޓުލުމަށް މި ލިބޭ ފުރުސަތު ގެއްލުވާ ނުލުމަށް ރައްޔިތުންގެ ކިބައިން އެެދިވަޑައިގެންފައެވެ.