ފުރަތަމަ ބުރަށްފަހު އެކި ދާއިރާތަކުގައި މަސައްކަތްކުރާ މީހުންނާ ބައްދަލުކުރައްވާފައިވޭ
އޭޕްރަންގައި މަސައްކަތްކުރާ މުވައްޒަފުންނަށް އޮކްޓޯބަރު 1ން ފެށިގެން ރިސްކު އެލަވަންސް ލިބޭނެ
މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގެ އޭޕްރަންގައި މަސައްކަތް ކުރާ މުވައްޒަފުންނަށް ރިސްކް އެލަވަންސް ދެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙު ނިންމަވައިފިއެވެ.
އަންގާރަ ދުވަހުގެ ރޭ ކުރިޔަށްދިޔަ ކަންމަތީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ފުރަތަމަ ބުރަށްފަހު އެކި ދާއިރާތަކުގައި މަސައްކަތްކުރާ މީހުންނާ ބައްދަލުކުރައްވާ އެމީހުންގެ ހުރި ކަންބޮޑުވުންތައް އަޑުއައްސަވާފައިވާކަމަށެވެ.
އަދި އެކަންކަމަށް ހައްލު ގެނައުމަށް މަސައްކަތްކުރައްވަމުން ގެންދަވާކަމަށް ރައީސް ވިދާޅުވިއެވެ.
އޭގެ އިތުރުން، އެއަރޕޯޓްގައި މަސައްކަތްކުރާ މުވައްޒަފުންގެ ތެރެއިން އޭޕްރަންގައި މަސައްކަތްކުރާ މުވައްޒަފުންނަށް ރިސްކު އެލަވަންސް ނުލިބޭތީ، އޮކްޓޯބަރު 1ން ފެށިގެން އެބޭފުޅުންނަށް ރިސްކު އެލަވަންސް ލިބޭނެކަމުގެ ޔަގީންކަންވެސް ރައީސް ވަނީ ދެއްވާފައެވެ.
ރައީސް ވިދާޅުވީ، އެއަރޕޯޓްގައި މަސައްކަތްކުރާ މުވައްޒަފުންނާ ބައްދަލު ކުރެއްވިކަމަށާއި އެއަރޕޯޓްގައި މަސައްކަތްކުރާ ހުރިހާ މުވައްޒަފުންގެ ވެސް ކަންބޮޑުވުމަކީ ޑޮލަރުން މުސާރަ ނުދިނުންކަމަށެވެ.
އެހެންކަމުން އެކަމަށް ހައްލު ގެނައުމުގެ ގޮތުން މުސާރައިގެ 50 އިންސައްތަ ޑޮލަރުން ދޭން މިހާރު ނިންމަވާފައިވާކަމަށް ރައީސް ވިދާޅުވިއެވެ.
