މިހާރު މި ފެންނަނީ ނޫސްވެރިކަމާއި ޚިޔާލު ފާޅުކުރުމުގެ ރަން ޒަމާނެއްކަމަށް ހިންނަވަރު ދާއިރާގެ މެންބަރު ޖީހާން މަޙުމޫދު ވިދާޅުވެއްޖެއެވެ.

ހޯމަ ދުވަހުގެރޭ ރާއްޖެޓީވީގެ ފަލަސުރުޚޯ ޕްރޮގްރާމްގައި ވާހަކަފުޅު ދައްކަވަމުން ޖީހާން ވިދާޅުވީ، މިހާރު މި ފެންނަނީ ނޫސްވެރިކަމާއި ޚިޔާލު ފާޅުކުރުމުގެ ރަން ޒަމާނެއްކަމަށެވެ. އެގޮތުން ނޫސްވެރިއެއް ނަމަވެސް، ނުވަތަ އާދައިގެ މީހެއްނަމަވެސް ފާޅު ކުރާ ޚިޔާލެއްގެ ސަބަބުން މިއަދު ޖަލަކަށް ނުލާނެކަމަށް ޖީހާން ވިދާޅުވިއެވެ.

ޖީހާން އިތުރަށް ވިދާޅުވީ، ނިމިދިޔަ ސަރުކާރުގެ 5 އަހަރުގެ ތެރޭގައި ފެންނަން އޮތީ އެ މަންޒަރެއް ނޫން ކަމަށެވެ. އެގޮތުން ނޫސްވެރިކަމުގެ މިނިވަންކަމަށް އޭރު އޮތް ހުރަސްތަކަށް ޖީހާންގެ ވާހަކަފުޅުގައި އަލިއަޅުވާލެއްވިއެވެ.

އޭގެ މިސާލެއްގެ ގޮތުން ޖީހާން ވަނީ އަބުރުގެ ޤާނޫނުގެ ދަށުން އޭރުގެ ސަރުކާރުން ނޫސްތަކާއި މީޑިއާތަކާމެދު އަޅަމުންދިޔަ ފިޔަވަޅުތަކުގެ މައްޗަށް އަލިއަޅުވާލައްވާފައެވެ.

މިއަދު ނޫސްވެރިންނާމެދު އެފަދަ ކަމެއް ހިންގާފައިނުވާކަމަށްވެސް ޖީހާން ވިދާޅުވިއެވެ.

އޭގެ އިތުރުން، ސިޔާސީ ގޮތުންވެސް މިއަދު މީހަކު ޖަލަށްލައިގެން ބަންދުކޮށްގެން އުޅެމުންނުދާކަން ޖީހާން ފާހަގަ ކުރެއްވިއެވެ.