މާލެ ރައްޔިތުންނަށް ދީފައި ހުރި ގޯތިތައް ފުށިދިއްގަރު ފަޅަށް ބަދަލުކުރައްވާނެކަމަށް މުއިއްޒު ވިދާޅުވާކަމަށް ބުނާ އޯޑިއޯއެއް
ވެެރިކަމަށް ވަޑައިގެން ދެތިން މަސް ތެރޭގައި އެކަން ކުރައްވާނެކަމަށް އޯޑިއޯގައި ބުނޭ
ވެރިކަން ލިބިއްޖެނަމަ މާލެ ރައްޔިތުންނަށް ދިން ހުރިހާ ގޯއްޗެއް ފުށިދިއްގަރު ފަޅަށް ބަދަލުކުރާނެކަމަށް އޯޑިއޯގައި ބުނެފައިވޭ
ވެރިކަން ލިބިއްޖެނަމަ، މާލެ ރައްޔިތުންނަށް ދީފައި ހުރި ގޯތިތައް ފުށިދިއްގަރު ފަޅަށް ބަދަލުކުރައްވާނެކަމަށް ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ވިދާޅުވާ ކަމަށް ބުނާ އޯޑިއޯއެއް ލީކުކޮށްލައިފިއެވެ.
ލީކުވެފައިވާ އޯޑިއޯގައި މުއިއްޒު ވިދާޅުވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން ދީފައިވާ ގޯތިތައް މިހާރު ދީފައި ހުރި ސަރަހައްދުތަކުން ބަދަލުކޮށް ފުށިދިއްގަރު ފަޅަށް ބަދަލުކުރުމުގެ ޕްރޮޖެކްޓެއް އިއުލާންކުރައްވާނެ ކަމަށެވެ.
ވެރިކަން ލިބިއްޖެނަމަ، މި ސަރުކާރުން މާލޭގެ ރައްޔިތުން ދީފައިވާ ބިންތައް އަތުލާނެ ކަމަށް މުއިއްޒު މީގެ ކުރިންވެސް އޭނާގެ އަރިހުގައި އުޅޭ ފަރާތްތަކުގެ ކައިރީގައި ވިދާޅުވެފައިވާ ކަމަށް ވާހަކަތައް ދެކެވިފައިވެއެވެ. އަދި މާލެ ސަރަހައްދުން ދޫކުރާ ގޯތި މުއިއްޒު ބަދަލުކުރައްވާނެކަމަށް ދެކެވޭ ވާހަކަތަކާއި ގުޅިގެން އެތަކެއްހާސް ރައްޔިތުންނެއް ތިބީ ކަންބޮޑުވުމެއްގެ ތެރޭގައެވެ.
ފުށި ދިއްގަރު ފަޅަކީ މާލޭގެ ރައްޔިތުންނަށް ގޯތި ދިނުމަށް މުއިއްޒު ވައުދުވެވަޑައިގެންފައިވާ ތަނެވެ. އެގޮތުން އެތަން ހިއްކާ އެތަން ގޯތިދިނުމަށް މުއިއްޒު ވަނީ ވައުދުވެވަޑައިގެންފައެވެ.
މާލޭގެ ރައްޔިތުންނާއި، މާލޭގައި ދިރިއުޅޭތާ 20 އަހަރުވެފައިވާ ފަރާތްތަކާއި ދަފްތަރުގައި ތިބި ފަރާތްތަކަށް ބިން ދިނުމަށް ސަރުކާރުން ނިންމާ، އެކަމުގެ އަމަލީ މަސައްކަތް ދަނީ ކުރަމުންނެވެ. އެގޮތުން ހުޅުމާލޭގެ ދެވަނަ ފިޔަވަހި އަދި ތިންވަނަ ފިޔަވަހިންނާއި، ގުޅިފަޅު، ގިރާވަރު ފަޅު އަދި އުތުރު ތިލަފަޅުން ގޯތި ދިނުމަށް ވަނީ ނިންމާފައެވެ.
މީގެ އިތުރުން ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ ގޮތުން މާލެ ރައްޔިތުންނާއި، މާލޭގެ 15 އަހަރަށްވުރެ ދިގުމުއްދަތަކަށް ދިރިއުޅެފައިވާ ފަރާތްތަކަށް ފުލެޓް ދިނުމަށް ވަނީ ހަމަޖެހިފައެވެ.
އެމްޑީޕީގެ ފުރަތަމަ ސަރުކާރުން ގުޅިފަޅުން ދޫކުރި ފުލެޓްތައް ވެސް ހައުސިން މިނިސްޓަރުކަމުގައި ހުންނަވައިގެން މުއިއްޒުވަނީ އަތުލައްވާފައެވެ. އަދި އޭގެ ބަދަލު ޕީޕީއެމްގެ ސަރުކާރުގައި ވެސް ގުޅިފަޅުން ފުލެޓް ލިބުނު ފަރާތްތަކަށް ބަދަލު ދީފައި ނުވެއެވެ. އަދި އެފަހުން ގާކޮށީގައި އެޅި ފުލެޓްތައް ވެސް އަގުބޮޑުކޮށް، އެތަން ލިބުނު ފަރާތްތަކުން އެތަން ދޫކުރަން މަޖުބޫރުކުރިއެވެ.
