ޤައުމަށާއި ރައްޔިތުންނަށް މިވަގުތު އޮތް އެންމެ ރަނގަޅު ގޮތަކީ ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް އިބްރާހިމް މުޙައްމަދު ޞާލިހަށް ތާއީދު ކުރުން ކަމަށް ޕްރޮފެސަރ ހަސަން އުގެއިލް ވިދާޅުވެއްޖެއެވެ.
ޕްރޮފެސަރ އުގެއިލް ހޯމަ ދުވަހު ފޭސްބުކްގައި ހިއްސާ ކުރެއްވި ޕޯސްޓެއްގައި ވިދާޅުވީ ރިޔާސީ އިންތީޚާބުގެ ދެވަނަ ބުރުގައި ވެސް އޭނާ ތާއީދު ކުރައްވާނީ ރައީސް ޞާލިހަށް ކަމަށެވެ. އެގޮތަށް ނިންމެވީ އޭނޭގެ ނަޒަރުގައި ޤައުމަށާއި ރައްޔިތުންނަށް މިވަގުތު އޮތް އެންމެ ރަނގަޅުގޮތަކީ އެއީ ކަމަށްވާތީ ކަމަށާއި އެމްޑީޕީއަކީ މިހާރު ރާއްޖޭގައި ސިޔާސީ ގޮތުން އޮތް އެންމެ ހަރުދަނާ އަދި ތަޖުރިބާކާރު ޕާޓީ ކަމަށް ވެސް އުގެއިލް ވިދާޅުވިއެވެ.
އެމްޑީޕީއަށް ތައުރީފު ކުރައްވައި އުގެއިލް ވިދާޅުވީ ޑިމޮކްރަސީގެ އުސޫލުތަކާއި އަސާސްތަކަށް ތާއީދު ކުރައްވާ ފަރުދެއްގެ ހައިސިއްޔަތުން އޭނާ ވޯޓު ދެއްވަން ބޭނުންފުޅުވަނީ އެ ޕާޓީއަށް ކަމަށެވެ.
މި ނިންމެވުމަކީ އޭނާގެ އަމިއްލަ ނިންމެވުމެއް ކަމަށާއި މި ނިންމެވުމާ ގުޅިގެން ބައެއް ފަރާތްތަކުގެ މަލާމާތާއި ފުރައްސާރަ ރައްދުވާނެކަން އެނގޭ ކަމަށް ވެސް އުގެއިލް ވިދާޅުވިއެވެ. އަދި އޭނާގެ ބޮލުގައި ދޮގު އިލްޒާމުތައް އަޅުވާނެކަން ވެސް އެނގޭކަމަށް އޭނާ ވިދާޅުވިއެވެ.
ފުރައްސާރައަށް ރައްދުދެއްވައި އުގެއިލް ވިދާޅުވީ ސަރުކާރުން ނުވަތަ ވެރިއެއްގެ ފަރާތުން އޭނާ ބޭނުންފުޅުވާ އެއްވެސް އެއްޗެއް ނެތް ކަމަށެވެ. އަދި އޭނާއަކީ ހަލާލުގޮތުގައި ހޯދާ ފައިސާ އާއި މުދަލުން އާއިލާއާއި އޭނާގެ ދިރިއުޅުން ސާދާގޮތުގައި ތަރުތީބުކުރައްވާ މީހެއްކަން ހެޔޮވިސްނޭ ދިވެހިންނަށް އެނގޭނެ ކަމަށް އޭނާ ވިދާޅުވިއެވެ.
މީގެ އިތުރުން އޭނާއަކީ އަބަދުވެސް ޤައުމަށާއި ރައްޔިތުންގެ ޙައްގުގައި އަމިއްލަ އެދުމުން އެއްކިބާވެހުރެ ބަސްބުނާ މީހެއްކަން ވެސް ހެޔޮވިސްނޭ ހުރިހާ ދިވެހިންނަށް އެނގޭނެ ކަމަށް އުގެއިލް ވިދާޅުވިއެވެ.
ރިޔާސީ އިންތިޚާބުގެ ފުރަތަމަ ބުރުގައި ވެސް ޕްރޮފެސަރ އުގެއިލް ތާއީދު ކުރެއްވީ ރައީސް ޞާލިހަށެވެ. އޭނާ ވިދާޅުވެފައިވާ ގޮތުގައި ސުލްހަވެރިކަމާއި އަމާންކަމާއެކު ތަރައްގީގެ އެތައް މަޝްރޫއުތަކެއް ފަށައި، ކުރިޔަށް ހިނގަމުންދާ މި ސަރުކާރު ބަދަލުކުރަންޖެހޭ ސަބަބެއް ނެތެވެ.
