ޔާމީން ރަޝީދުގެ މަރުގެ މައްސަލައިގައި ދައުވާކުރަން ފޮނުވައިފި
20 ޖުލައި 2017 | ބުރާސްފަތި 12:46ތިން މީހުންގެ މައްޗަށް ތިން ދައުވާއެއްކޮށްދިނުމަށް އެދިފައިވޭ
ޔާމީން ރަޝީދު މަރާލުމުގައި ބައިވެރިވިކަމަށް ފުލުހުން ތުމަތުކުރާ މީހުން
އަނިޔާވެރި، ރަހުމުކުޑަގޮތަކަށް މަރާލާފައި އޮއްވާ ފެނުނު، ލިޔުންތެރިޔާ ޔާމީން ރަޝީދުގެ މަރުގެ މައްސަލާގައި ތިން މީހެއްގެ މައްޗަށް، ތިން ދައުވާއެއްކުރުމަށް ފޮނުވައިފި އެވެ.
ޔާމީން ރަޝީދުގެ މަރުގެ މައްސަލާގައި ދައުވާކޮށްދިނުމަށްއެދި ފޮނުވާފައިވަނީ އެ މައްސަލާގައި ހައްޔަރުކޮށްފައިވާ، އިސްމާއިލް ރަޝީދާއި، އިސްމާއިލް ހައިޝަމް ރަޝީދުއާއި އަހުމަދު ޒިހާން އިސްމާއިލްގެ މައްޗަށެވެ.
އެ ތިން މީހުންގެ މައްޗަށްވެސް ތިން ދައުވާއެއްކޮށްދިނުމަށް އެދި ހުށައަޅާފައިވެއެވެ. އެގޮތުން އެ ތިން މީހުންފެ މައްޗަށް ދައުވާކޮށްދިނުމަށް އެދި ހުށައަޅާފައިވަނީ ގަސްދުގައި މީހަކު މެރުމުގެ ދައުވާއާއި، ޓެރަރިޒަމްގެ ދައުވާއާއި، ތޫނު ހަތިޔާރު ބޭނުންކޮށްގެން މާރާމާރި ހިންގިކަމުގެ ދައުވާއެވެ.
ފުލުހުން ބުނީ އެމީހުންގެ ތެރެއިން ހައިޝަމަކީ ހަތިޔާރު ބޭނުންކޮށްގެން ފޭރުމުގެ މައްސަލައިގެ ކުށުގެ ރެކޯޑު އޮންނަ މީހެއް ކަމަށެވެ. އަދި އޭނާ އަކީ ފޭރުމުގެ މައްސަލައެއްގައި ހުކުމް ތަންފީޒުކޮށްފައިވާ މީހެއް ކަމަށް ވެސް ފުލުހުން ބުންޏެވެ.
އިސްމާއީލް ރަޝީދަކީ ގްރޫޕް ހަދައިގެން ހަތިޔާރު ބޭނުންކޮށްގެން މާރާމާރީ ހިންގާ ކަމުގެ ކުށުގެ ރެކޯޑު އޮންނަ މީހެއް ކަމަށް ވެސް ފުލުހުން ބުންޏެވެ.
ޔާމީން ރަޝީދު މަރާލާފައި އޮއްވާ ފެނުނީ މި އަހަރުގެ އޭޕްރީލް މަހުގެ 23 ވަނަ ދުވަހުގެ ރޭ ދަންވަރުގެ ވަގުތެއްގައެވެ.
