ގެވެށި އަނިޔާއާ ގުޅޭ 7 މައްސަލައެއް އޯގަސްޓު މަހު ފެމިލީ ކޯޓަށް ހުށަހަޅާފައިވޭ
25 ސެޕްޓެމްބަރު 2023 | ހޯމަ 14:09ރައްކާތެރި ކުރުމުގެ އަވަސް އަމުރުގެ ގޮތުގައި 4 އަމުރެއް ވަނީ ނެރެފައި
ކައިވެންޏާއި ވަރީގެ ތަފާސްހިސާބުތަކަށް ބަލާއިރު، އޯގަސްޓު މަހު ވަނީ 171 ކައިވެނި ކޮށްދީފައި
މިދިޔަ އޯގަސްޓު މަހު، ގެވެށި އަނިޔާއާ ގުޅޭ 7 މައްސަލައެއް ފެމިލީ ކޯޓަށް ހުށަހަޅާފައިވާކަމަށް އެެ ކޯޓުން ބުނެފިއެވެ.
ފެމިލީ ކޯޓުން ވަނީ އެ ކޯޓުގެ ނިމިދިޔަ މަހުގެ ތަފާސްހިސާބުތައް އާންމުކޮށްފައެވެ.
ތަފާސްހިސާބުތައް ދައްކާގޮތުގައި އޯގަސްޓު މަހު ގެވެށި އަނިޔާއާ ގުޅޭ 7 މައްސަލައެއް ހުށަހަޅާފައިވާއިރު، ރައްކާތެރި ކުރުމުގެ އަވަސް އަމުރުގެ ގޮތުގައި 4 އަމުރެއް ވަނީ ނެރެދީފައެވެ.
ޖުލައި މަހުގެ މައްސަލަތަކުގެ ތެރެއިން 7 މައްސަލައެއް އޯގަސްޓު މަހާ ހަމައަށް އައިއިރު ނުނިމި ހުއްޓެވެ. އަދި އޯގަސްޓު މަސް ނިމުނުއިރު 7 މައްސަލައެއް ނުނިމި ހުރިކަމަށް އެ ކޯޓުގެ ތަފާސްހިސާބުތަކުން ދައްކައެވެ.
އޭގެ އިތުރުން، އޯގަސްޓު މަހު ފެމިލީ ކޯޓަށް ހުށަހަޅާފައިވާ މައްސަލަތަކުގެ ތެރެއިން 71 އިންސައްތަ މައްސަލައަކީ އަންހެނުން ހުށަހަޅާފައިވާ މައްސަލަކަމަށްވެސް އެ ކޯޓުން މައުލޫމާތު ދެއެވެ.
ކައިވެންޏާއި ވަރީގެ ތަފާސްހިސާބުތަކަށް ބަލާއިރު، އޯގަސްޓު މަހު ވަނީ 171 ކައިވެނި ކޮށްދީފައެވެ.
ވަރީގެ މައްސަލަތަކަށް ބަލާއިރު، 132 ވަރި ކޮށްދީފައިވެއެވެ.
