އަމިއްލަ ރަށް ނޫން ރަށްރަށުގައި މަސައްކަތްކުރާ ޕްރިންސިޕަލުންނަށް ދޭ ހައުސިން އެލަވަންސް 7000 ރުފިޔާއަށް ބޮޑުކުރަން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ނިންމަވައިފިއެވެ.

ބުރާސްފަތި ދުވަހުގެ ރޭ ހުވަދޫ ޖަގަހައިގައި ބޭއްވެވި ކެމްޕޭން ޖަލްސާގައި ވާހަކަފުޅު ދައްކަވަމުން ރައީސް ސާލިހު ވިދާޅުވީ އަމިއްލަ ރަށް ނޫން އެހެން ރަށްރަށުގައި މަސައްކަތް ކުރަައްވާ ޕްރިންސިޕަލުން ގެދޮރު ކުށްޔަށް ހިފަން ޖެހުމުން ކުރަންޖެހޭ ޚަރަދު ބޮޑުވުމުގެ މައްސަލަ އަންނަ ކަމަށެވެ.

އެކަންބޮޑުވުންތައް ޕްރިންސިޕަލުން ހިއްސާކޮށްފައިވާކަން ފާހަގަކުރައްވައި ރައީސް ސާލިހު ވިދާޅުވީ މިމައްސަލަ ހައްލުކޮށްދިނުމަށް އަމިއްލަ ރަށް ނޫން އެހެން ރަށެއްގައި މަސައްކަތް ކުރާ ޕްރިންސިޕަލުންނަށް ހައުސިން އެލަވަންސްއެއްގެ ގޮތުގައި އިތުރު 7000 ރުފިޔާ ދެއްވަން ނިންމަވާފައިވާ ކަމަށެވެ.

ރައީސް ވިދާޅުވީ ރާއްޖޭ ތައުލީމީ ދާއިރާ ކުރިއެރުވުމަށް މި ސަރުކާރުން ދަނީ ގިނަ މަސައްކަތްތައް ކުރަމުން ކަމަށެވެ.

މި މަސައްކަތްތަކަށް އިޝާރާތް ކުރައްވައި ރައީސް ސާލިހު ވިދާޅުވީ ހިލޭ ޑިގްރީ ޕްރޮގްރާމާއި ސްކޮލަރޝިޕްތައް ވީހާ ވެސް ގިނަ ދަރިވަރުންނަށް ފަހިކޮށްދިނުމުގެ އިތުރުން ރަށްރަށުގެ ސްކޫލުތަކުގެ އުމްރާނީ ތަރައްޤީ އާއި އަދި ރަނގަޅު ޓީޗަރުންނާއި ޕްރިންސިޕަލުން ހޯދުމަށްޓަކައި ވަރަށް ގިނަ މަސައްކަތްތަކެއް ސަރުކާރުން ކުރަމުންގެންދާ ކަމަށެވެ.

މިދައުރުގައި ހަމައެކަނި ރާއްޖޭގެ އެކި ސްކޫލުތަކުގައި 1200ށް ވުރެ ގިނަ ކްލާސްރޫމާއި 80ށް ވުރެ ގިނަ މަލްޓިޕަރޕަސް ހޯލު އަޅައި ނިމިފައިވާ ކަމަށް އެމަނިކުފާނު ވިދާޅުވިއެވެ.

ޕްރިންސިޕަލުންނަށް ދޭ އެލަވަންސް 7000 ރުފިޔާއަށް ބޮޑުކުރަން މިސަރުކާރުން ނިންމާފައިވާއިރު، މިހާރު ހައުސިން އެލަވަންސްގެ ގޮތުގައި ލިބެނީ 5000 ރުފިޔާއެވެ.