އެއްވެސް ބޭފުޅަކު ރައީސް ސާލިހްގެ 5 އަހަރުގެ ލީޑަރޝިޕާމެދު ސުވާލެއް ނުއުފައްދަވާނެ: އީސަ
21 ސެޕްޓެމްބަރު 2023 | ބުރާސްފަތި 13:08ސިޔާސީ ހަޔާތުގައި ދިވެހިރާއްޖޭގައި ވެރިކަންކުރެއްވި އެންމެ ވަރުގަދަ އެއް ލީޑަރު
މެމްބަރު އީސަ
އެއްވެސް މީހަކު ރައީސް ސާލިހުގެ 5 އަހަރުގެ ލީޑަރޝިޕާމެދު ސުވާލެއް ނުއުފައްދާނެކަމަށް، ކެނދިކުޅުދޫ ދާއިރާގެ އިއްޒަތްތެރި މެމްބަރު އަހްމަދު އީސާ ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހްގެ ކެމްޕޭން ހަރަކާތާ ގުޅިގެން ރާއްޖެޓީވީގެ ޚާއްސަ ކަވަރޭޖްގައި ވާހަކަފުޅުދައްކަވަމުން، ރައީސް ސާލިހް ސިފަކުރައްވައި، ކެނދިކުޅުދޫ ދާއިރާގެ އިއްޒަތްތެރި މެމްބަރު އަހްމަދު އީސާ ވިދާޅުވީ، ރައްޔިތުންގެ މަޖިލީހުގެ މެމްބަރު ކަމުގައި ހުންނެވި ދުވަސްވަރުގެ އިތުރުން، ޕީޖީ ލީޑަރަކަށް ހުންނެވި ދުވަސްވަރުވެސް، ރައީސް ސާލިހަކީ، ހުރިހާ އެންމެންނާވެސް ވާހަކަފުޅުދައްކަވާ، ހަމަތަކާއި އުސޫލްތަކުގެ މަތީގައި ދެމިހުންނަވާ ބޭފުޅެއްކަމަށެވެ. އަދި ހަމަޔާއި އިންސާފު، ވަރަށް ބޮޑަށް ގަބޫލުފުޅު ކުރައްވާ ބޭފުޅެއްކަމަށާއި، ރައީސް ސާލިހަކީ މަޑުމައިތިރި، އަޚްލާގް ރަނގަޅު، ބޭކާރު ވާހަކަފުޅު ދެއްކެވުން މަދު ބޭފުޅެއް ކަމަށެވެ. އަދި ރައީސް ސާލިހްގެ ނިންމެވުންތަކަށް އެއްވެސް މީހެއްގެ ހިތްހަމަނުޖެހުމެއް ނޯންނަކަންވެސް އީސަ ފާހަގަކުރެއްވިއެވެ.
އީސަ ވިދާޅުވީ، ރައީސް ސާލިހަކީ، މީގެ ކުރިން ވެރިއަކު ދިވެހިރާއްޖެއަށް ކޮށްނުދެއްވާހާ ގިނަގުނަ ޚިދުމަތްތަކެއް ކޮށްދެއްވި ވެރިއެއްކަމަށެވެ.
މީގެއިތުރުން ރައީސް ސާލިހް ސިފަކުރައްވައި އީސަ ވިދާޅުވީ، ރައީސް ސާލިހަކީ އެ ބޭފުޅާގެ ސިޔާސީ ހަޔާތްޕުޅުގައި ދިވެހިރާއްޖޭގައި ވެރިކަންކުރެއްވި އެންމެ ވަރުގަދަ އެއް ލީޑަރުކަމުގައެވެ.
ރައީސް ސާލިހްގެ އަމާޒު ބޮޑަށް ގެންގުޅުއްވީ، ގައުމީ މަސްލަހަތުހުރި ކަންކަން ހަމަމަގަށް އަޅުއްވައި، ރައްޔިތުންނާ ގުޅުންހުރި ކަންކަން ފަހިކޮށްދެއްވަން ކަމަށްވެސް އީސަ ވިދާޅުވިއެވެ. އަދި ސިޔާސީ ވާދަވެރިކަމުގެ ތެރޭގައިވެސް ވެރިއެއްގެ ހުންނަންވާ ފޯކަސް ގެއްލުވާނުލައްވައި، ރައްޔިތުންނަށްޓަކައި ހަރުދަނާ ވެރިކަމެއް ކޮށްދެއްވި ބޭފުޅެއްކަން ފާހަގަކުރައްވާ އީސަ ވިދާޅުވީ، އެއްވެސް މީހަކު ރައީސް ސާލިހުގެ 5 އަހަރުގެ ލީޑަރޝިޕާމެދު ސުވާލު ނުއުފައްދާނެކަމަށެވެ.
