ގަވާއިދާ ޚިލާފަށް މަސް ބާނަމުންދިޔަ ބޯޓުތައް ފުލުހުންނާއި ހަވާލުކޮށްފި
21 ސެޕްޓެމްބަރު 2023 | ބުރާސްފަތި 03:29އެމްއެންޑީއެފުން ބުނިގޮތުގައި މިހާރު މިބޯޓުތައް މާލެ ގެނެސް ދޫނިދޫ ބަނދަރަށް ވައްދައި، ފުލުހުންނާއި ވަނީ ހަވާލުކޮށްފައި
ގަވާއިދާ ޚިލާފަށް ރާއްޖެ އެތެރެވި އުޅަނދުތައް
ރާއްޖޭގެ ޚާއްޞަ އިޤުތިޞާދީ ސަރަޙައްދުގައި ޤާނޫނާ ޚިލާފަށް މަސްވެރިކަންކުރުމުގެ ތުހުމަތުގައި، ކޯސްޓްގާޑުގެ ބެލުމުގެ ދަށަށް ގެންދިޔަ ސްރީލަންކާގެ ފަސް މަސްބޯޓް މާލެ ގެނެސް ދިވެހި ފުލުހުންނާއި ހަވާލުކޮށްފިއެވެ.
ރާއްޖޭގެ ޚާއްސަ އިޤްތިޞާދީ ސަރަޙައްދުގައި ޤާނޫނާ ޚިލާފަށް މަސްވެރިކަންކުރަމުންދިޔަ ބޭރުގެ 5 މަސްބޯޓު އެމްއެންޑީއެފް ކޯސްޓްގާޑްގެ ބެލުމުގެ ދަށަށް ގެންދިޔައީ ސެޕްޓެމްބަރު މަހުގެ 18 ވަނަ ދުވަހެވެ.
އެމްއެންޑީއެފުން ބުނީ އަތުލައިގަތީ ސްރީލަންކާގެ ބޯޓުތަކެއްކަމަށެވެ. މިބޯޓުތައް ކޯސްޓްގާޑުގެ ބެލުމުގެ ދަށަށް ގެންގޮސްފައިވަނީ، އދ.މަހިބަދޫ "އަސުރުމާ" މަސްދޯނިން ފޯރުކޮށްދިން މައުލޫމާތަކާއި ގުޅިގެން ކުރިއަށްގެންދިޔަ އޮޕަރޭޝަނެއްގައި ކަމަށް އެމްއެންޑީއެފުން ބުނެއެވެ. އެ މަޢުލޫމާތުގެ އަލީގައި ފެށި އޮޕަރޭޝަން ހުއްޓާނުލާ އަދިވެސް ކުރިއަށްދާކަމަށް އެމްއެންޑީއެފުން ބުނެއެވެ.
އަދި އެންމެ ފުރަތަމަ އަތުލައިގެން 4 ބޯޓު ފެނިފައިވަނީ، އެމްއެންޑީއެފް ކޯސްޓްގާޑްގެ ޕެޓްރޯލް ކްރާފްޓް "ނޫރައްދީން" ޕެޓްރޯލް ކުރަމުން ދަނިކޮށް ކަމަށާއި އެ ބޯޓުތައް ފެނުނީ ކ.ކާށިދޫގެ އިރުން ގާތްގަޑަކަށް 85 މޭލު ބޭރުން ކަމަށް ވަނީ ބުނެފައެވެ. އަދި 5 ވަނަ ބޯޓް ކޯސްޓްގާޑުގެ ބެލުމުގެ ދަށަށް ގެންގޮސްފައިވަނީ އެމްއެންޑީއެފް ކޯސްޓްގާޑް ޝިޕް ޣާޒީ ޕެޓްރޯލް ކުރަމުން ދަނިކޮށް ޅ.އަތޮޅުގެ އިރުން ގާތްގަނޑަކަށް 74 ނޯޓިކަލް މޭލު ބޭރުން ކަމަށް އެމްއެންޑީއެފުން ވަނީ ބުނެފައެވެ.
އެމްއެންޑީއެފުން ބުނިގޮތުގައި މިހާރު މިބޯޓުތައް މާލެ ގެނެސް ދޫނިދޫ ބަނދަރަށް ވައްދައި، ފުލުހުންނާއި ވަނީ ހަވާލުކޮށްފައެވެ.
