މާލެ ލީގުގެ ޗެމްޕިއަންކަން މާޒިޔާ ހޯދައިފި

އެސްޓީއޯ މާލެ ލީގުގެ ޗެމްޕިއަންކަން މާޒިޔާ ސްޕޯޓްސް އެންޑް ރެކްރިއޭޝަން އިން ހޯދައިފިއެވެ.

މާޒިޔާއިން ޗެމްޕިއަންކަން ހޯދީ މާލެ ލީގުގެ ފަހު މެޗުގައި ބުދަ ދުވަހުގެރޭ އެޓީމާއި އެންމެ ވާދަވެރި ނިއުރޭޑިއަންޓް ސްޕޯޓްސް ކްލަބާ ދެކޮޅަށް ކުޅުނު މެޗް އެއްވަރުކޮށް ފައިދާ ލަނޑުގެ ތަފާތުންނެވެ.

ތާވަލުގެ އެއްވަނާގައި މާޒިޔާ އޮތީ 27 ޕޮއިންޓް ހޯދައިގެންނެވެ. ދެވަނާގައި އޮތް ކްލަބް ގްރީން ސްޓްރީޓާއި ތިންވަނާގައި އޮތް ނިއުރޭޑިއަންޓް ސްޕޯޓްސް ކްލަބަށް ވެސް ހަމަ މި އަދަދަށް ޕޮއިންޓް ލިބިފައި ވީ ނަމަވެސް މާޒިޔާއަށް އެއްވަނަ ލިބެނީ ފައިދާ 10 ގޯލުންނެވެ. ގްރީންއަށް ދެވަނަ ލިބެނީ ފައިދާ ނުވަ ގޯލުންނެވެ. ތިންވަނާގައި އޮތް ނިއުއަށް ލިބިފައިވަނީ ފައިދާ ހަތް ގޯލެވެ.

ހަތަރު ވަނާގައި ލީގު ނިންމާލާފައިވަނީ ޓީސީންނެވެ. އެކުލަބަށް ލިބިފައިވަނީ 22 ޕޮއިންޓެވެ. ފަސް ވަނާގައި އޮތް އީގަލްސް އާއި ހަވަނާގައި އޮތް ވިކްޓްރީއަށް ވެސް ލިބިފައިވަނީ ހަމަ 22 ޕޮއިންޓެވެ. ނަމަވެސް ޓީސީ އަށް ހަތަރު ވަނަ ލިބެނީ ފައިދާ 11 ލަނޑުންނެވެ.

މާޒިޔާ އާއި ނިއު ބައްދަލުކުރި މެޗް ފެށިގެން ރަނގަޅަށް ކުޅެފައިވަނީ ނިއުއިންނެވެ. އެގޮތުން އެޓީމުން ވަނީ މެޗުގެ ވަރަށް ކުރީކޮޅުގައި ލަނޑެއް ކާމިޔާބުކޮށް ލީޑު ނަގާފައެވެ. އެގޮތުން މެޗުގެ 2 ވަނަ މިނެޓުގައި އެޓީމަޑް މި ލަނޑު ކާމިޔާބުކޮށްދިނީ މިފަހަރުގެ ޓްރާންސްފާގައި އެޓީމާއި ގުޅުނު ތަޖުރިބާކާރު މިޑްފިލްޑާ އިބްރާހިމް ފަޒީލް (އޮއްޕޮ) އެވެ.

ނިއުއިން މެޗުގެ ވަރަށް ކުރީކޮޅުގައި ލީޑު ނެގި ނަމަވެސް މާޒިޔާއިން ހިތްވަރު ދޫކޮށްލާފައެއް ނުވެއެވެ. އެގޮތުން އެޓީމުން ވަނީ ކުޅުން ވަރުގަދަކޮށް މަޑުމަޑުން މެޗުގެ ކޮންޓްރޯލް އަތުލާފައެވެ. އެޓީމުން ވަނި ފުރަތަމަ ހާފުގެ ތެރޭގައިވެސް ރަނގަޅު ފުރުސަތުތަކެއް ތަނަވަސް ކޮށްފައެވެ. ނަމަވެސް އެންމެ ބޯޅައެއްވެސް ތިން ދަނޑިން އެތެރެ ކޮށްލެވޭގޮތް ވަނީ ނުވެފައެވެ.

އެއާ ހިލާފަށް ދެވަނަ ހާފުގައި މާޒިޔާއިން ވަނީ އެޓީމުން ކުރަމުންދިޔަ އެޓޭކްތަށް ވަރުގަދަ ކޮށްފައެވެ. ފުލުފުލުގައި އެޓީމުން ހަމަލާތަށް އުފައްދަމުންގޮސް މެޗުގެ 59 ވަނަ މިނެޓުގައި އެޓީމުން ވަނީ ނަތީޖާ ހަމަހަމަކޮށް އުންމީދު އާކޮށްފައެވެ. ލިބުނު ހިލޭޖެހުމަކިން އެޓީމްގެ ބިދޭސީ ޑިފެންޑަރު ކޮވަސޮވިޗް ނަގައިދިން ބޯޅަ އަމްދާން ގޯލުގެ ތެރެއަށް ފޮނުވާލީ ބޮލުންނެވެ.

މި ލަނޑާއެކު ނަތީޖާ ހަމަހަމަކޮށް މާޒިޔާއިން ވަނީ ނިއުއިން ކުރަމުންދިޔަ އެޓޭކްތަށް ހިފަހައްޓައި މޮޅު ޑިފެންސެއް ކޮށްފައެވެ. އެގޮތުން އެޓީމުންވަނީ މިނަތީޖާގައި މެޗު ނިންމާލައި ޗެމްޕިއަންކަން ހޯދާފައެވެ.

މާލެ ލީގުގެ ފުރަތަމަ ބުރު 100 ޕަސެންޓް މޮޅާއިއެކު މާޒިޔާއިން ނިންމާލިއިރު ލީގުގެ ދެވަނަ ބުރުގައި އެޓިމަށް މާ އެދެވޭ ނަތީޖާތަކެއް ނެރެވިފައެއް ނުވެއެވެ. އެގޮތުން ދެވަނަ ބުރުގައި އެޓީމަށް މޮޅު ވެވިފައި ވަނީ އެންމެ މެޗަކުންނެވެ. އަދި އެޓިމް ވަނީ 3 މެޗުން ބަލިވެފައެވެ. ބާކީ ތިން މެޗުން އެޓީމް ވަނީ އެއްވަރުވެފައެވެ.

މިނަތީޖާއާ އެކު މާލެ ލީގުން ދިވެހި ޕްރެމިއާ ލީގަށް ކޮލިފައި ވެފައި ވަނީ މާލެ ލީގުގެ ގަދަ ހަތަރު ޓީމް ކަމަށްވާ މާޒިޔާ ސްޕޯޓްސް އެންޑް ރެކްރިއޭޝަން އާއި، ކްލަބް ގްރީން ސްޓްރީޓާއި، ނިއުރޭޑިއަންޓް ސްޕޯޓްސް ކުލަބުގެ އިތުރުން ޓީސީ ސްޕޯޓްސް ކުލަބެވެ. ޕްރެމިއާ ލީގުގައި މި ޓީމްތަކުގެ އިތުރުން ދެން ވާދަކުރާނީ އެސްޓީއޯ މިނިވަން ޗެމްޕިއަންޝިޕްގެ ގަދަ 4 ޓީމެވެ. އެއީ ދ.ކުޑަހުވަދޫ އާއި، ގދ.ތިނަދޫ އާއި، އއ.މާޅަހުގެ އިތުރުން، ށ.މިލަންދޫއެވެ.

މާލެ ލީގުގެ ފުލަށް ދިޔަ އީގަލްސް، ވިކްޓްރީ، ވެލެންސިއާ އަދި ޔުނައިޓެޑް ވިކްޓްރީއަށް ރެލިގޭޝަނުން ސަލާމަތް ވުމަށްޓަކާ ދެން ޖެހޭނީ މާލެ ލީގު ޕްލޭއޮފްގައި ކުޅޭށެވެ. ޕްލޭއޮފްގައި މި ޓީމްތަކުގެ އިތުރުން ދެން ވާދަކުރާނީ ސެކަންޑް ޑިވިޝަންގެ އެންމެ ގަދަ ހަތަރު ޓީމް ކަމަށްވާ ކްލަބް ޒެފްރޯލް އާއި ކުޑަހެންވޭރު ޔުނައިޓެޑެވެ.