ރައްޔިތުންގެ މާލިއްޔަތު ޕީއެންސީގެ ކެންޑިޑޭޓް ޑރ. މުއިއްޒުއާ ހަވާލުކުރަން ހެޔޮނުވާނެ: މެންބަރު އަހުމަދު އީސާ
ހިޔާ ފްލެޓްތައްވެސް ބަައްސަވާލެއްވީ މެޑަމް ފާތިމަތު އިބްރާހީމް ދެއްވި ލިސްޓުގައި ތިބި މީހުންނަށް
ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު
ރައްޔިތުންގެ މާލިއްޔަތު ޕީއެންސީގެ ކެންޑިޑޭޓް ޑރ. މުހައްމަދު މުއިއްޒުއާ ހަވާލުކުރަން ހެޔޮނުވާނެ ކަމަށް، ކެނދިކުޅުދޫ ދާއިރާގެ މެންބަރު އަހުމަދު އީސާ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި މެންބަރު ވިދާޅުވީ މާޒީއަށް ބަލާއިރު، ޑރ. މުއިއްޒު ހަތް އަހަރު ދުވަހު ކެބިނެޓްގައި އިންނަވައިގެން ރައްޔިތުންނަށް އިޚްލާސްތެރިކޮށް ކޮށްދެއްވި ކަމެއް ފެންނަން ނެތް ކަމަށާއި، މަސައްކަތް ކުރައްވާފައިވަނީ ރައްޔިތުންނަށް ނިކަމެތިކަން ލިބޭ ގޮތަށް ކަމަށެވެ. އެގޮތުން އެބޭފުޅުންގެ ވެރިކަމުގައި ހިޔާ ފްލެޓްތައްވެސް ބެއްސެވީ މެޑަމް ފާތިމަތު އިބްރާހީމް ދެއްވި ލިސްޓުގައި ތިބި މީހުންނަށް ކަމަށާއި، ބޯހިޔާވަހިކަމަށް ޝަރުތުހަމަވޭތޯ ނުވަތަ ނުވޭތޯވެސް ބައްލަވާފައި ނުވާކަމަށް މެންބަރު ވިދާޅުވިއެވެ.
ކުރީގެ ސަރުކާރަށް އިޝާރާތް ކުރައްވައި މެންބަރު ވިދާޅުވީ، މަޝްރޫއުތައް ހިންގަމުންދިޔައިރު ބޭރުގެ ކުންފުނިތަކުން ފޮނުވާ ފައިސާ ޖަމާކުރެއްވީވެސް ޑރ. މުއިއްޒުގެ އަމިއްލަފުޅު އެކައުންޓަށް ކަމަށެވެ. އަދި މިފައިސާތަކަށް ވީނުވީއެއް ނޭނގޭ ކަމަށް މެންބަރު ވިދާޅުވިއެވެ. އެހެންކަމުން ދައުލަތުގެ ބާރާއި، ރައްޔިތުންގެ ބައިތުލްމާލު ހަވާލުކުރުމަށް ހެޔޮނުވާނެ ކަމަށް މެންބަރު އަހުމަދު އީސާ ވިދާޅުވިއެވެ.
މެންބަރު އަހުމަދު އީސާ ވިދާޅުވީ, ކުރީގެ ރައީސް އަދި މިހާރު ޖަލު ހުކުމެއް ތަންފީޒު ކުރައްވަމުން ގެންދަވާ އަބްދުﷲ ޔާމީނާއި ޑރ. މުއިއްޒުއަކީ އެކައްޗެއް ކަމަށާއި، ކަންކަން ކުރެއްވުމުގައި ތަފާތެއް ނުހުންނާނެ ކަމަށެވެ. މެންބަރު ވިދާޅުވީ މާޒީއަށް ބަލާއިރު، ރައްޔިތުންނަށް އިޚްލާސްތެރިވެ ވަޑައިނުގަންނަވާނެ ކަން އެނގިވަޑައިނުގަންނަވާ ކަމަށާއި، އަނިޔާވެރިވާނެ އިސްކުރާނެކަން ޔަގީންވެވަޑައިގަންނަވާ ކަމަށެވެ. އަދި ވިދާޅުވީ ޑރ. މުއިއްޒުއާ ކުރިއަށް އޮތް ފަސް އަހަރު ވެރިކަން ހިންގުމަށް ހަވާލުކޮށްފިނަމަ ދައުލަތުގެ ތިޖޫރީ ހުންނަތަނުގައި އޮންނާނީ ވަޅުގަނޑެއް ކަމަށެވެ.
އެހެންކަމުން ކުރިއަށް އޮތް ރިޔާސީ އިންތިޚާބުގެ ދެވަނަ ބުރުގައި ރައްޔިތުން ވޯޓުލާއިރު، މިކަންކަމަށް ރައްޔިތުން ވަރަށް ފުންކޮށް ވިސްނަންޖެހޭ ކަމަށް މެންބަރު ވިދާޅުވިއެވެ. ރައްޔިތުންނަށް އޯގާތެރިކަމާއެކު ޚިދުމަތް ކުރައްވާ ވެރިއެއް އެބަހުންނެވި ކަމަށާއި، އެކަންކަމަށް ބެލުމަށްފަހު އިންސާފުވެރި ނަޒަރަކުން ވޯޓުލުމަށް މެންބަރު ގޮވާލެއްވިއެވެ.
